A Xunta e a Universidade poñen en marcha unha nova convocatoria do programa Uni-Porta

Un ano máis, a Consellería de Innovación e Industria e as tres universidade galegas poñen en marcha o programa Uni-Porta que ofrece aos estudantes axudas para mercar ordenadores portátiles. Con esta iniciativa trátase de integrar as novas tecnoloxías no ámbito universitario facilitando aos alumnos o acceso aos servizos e contidos de Internet e das Intranet universitarias. O obxectivo é fomentar o uso das ferramentas web dun xeito deslocalizado e flexible mediante un programa de axudas á adquisición de ordenadores que deben ser portátiles e con conectividade sen fíos.
A convocatorio de Uni-Porta para este ano 2008 permanecerá aberta dende esta semana ata o vindeiro 29 de febreiro, data límite de presentación de solicitudes.
A Universidade de Vigo pon á disposición dos seus estudantes un total de 764 subvencións de 200 euros cada unha para ordenadores mercados entre o 1 de xaneiro e o 15 de novembro de 2008 sexa cal sexa o modelo sempre que sexa portátil e con conexión wifi. A compra pode realizarse en calquera establecemento comercial e, dentro deste tipo de axuda non entran nin PDAs nin videoconsolas.
O programa está dirixido a estudantes das tres universidades galegas, sempre que estean matriculados en titulacións oficiais de primeiro, segundo ou terceiro ciclo, tanto en centros propios como adscritos. Non poderán acceder ás axudas os matriculados en titulacións non oficiais como posgraos propios ou titulacións propias, cuarto ciclo ou Curso de Aptitude Pedagóxica (CAP) e todos aqueles que teñan sido beneficiarios de anteriores convocatorios do programa Uni-Porta.

Prazos e solicitudes

A data límite de presentación de solicitudes é o vindeiro 29 de febreiro e os formularios, que se atopan na web http://www.uvigo.es/uniporta, deben ser enviados electronicamente.
Unha vez finalizado o prazo para enviar as solicitudes vía web, a Universidade de Vigo procederá a comprobar que os solicitantes cumpren os requisitos indicados e tendo en conta a orde de recepción das solicitudes, fará pública a lista de beneficiarios das axudas, concedéndolle a tódalas persoas que figuren na devandita lista un prazo non superior a un mes para presentar a documentación precisa.