Diario da Universidade de Vigo
O Teatro Principal de Ourense acolleu o sábado o Encontro de Coros Universitarios
Música coral para festexar os lazos culturais entre Galicia e Portugal
Participaron agrupacións dos campus de Ourense e Minho
Imaxe da actuación conxunta dos dous coros participantes
A agrupación convidada ao encontro foi o coro da Universidade do Minho
A actuación tivo lugar no Teatro Principal de Ourense
Co obxectivo de “festexar a cultura, a música e o canto coral” que une a Galicia e Portugal, este sábado celebrouse no Teatro Principal o Encontro de Coros Universitarios, organizado polo coro do campus de Ourense Schola Cantorum (Cuco). Nel, cantoras e cantores da UVigo compartiron escenario cos seus homólogos da Universidade do Minho, interpretando cada un deles nove cancións. Foi un concerto cun “repertorio variado e ecléctico, cheo de pezas populares, de compositores contemporáneos, bandas sonoras, pezas de cantautores con letras preciosas e ritmos africanos”. A cita rematou coa representación conxunta de Cada noite, con letra de Rosalía de Castro e música de Maximino Zumalave, e Venham mais cinco, de José 'Zeca' Afonso. Con esta actuación Cuco quixo unirse ademais á conmemoración este curso académico do 50 aniversario do campus de Ourense.