Novas do DUVI

O coro da Universidade de Vigo, aberto e multicultural

• Vigo
• Cultura

Dispor dunhas horas á semana, ter gañas de cantar e de pasalo ben son os requisitos iniciais para participar no coro, un grupo aberto a toda a comunidade universitaria e mesmo a calquera persoa interesada na música e no canto. “Non se precisa experiencia previa nin coñecementos de solfexo, só un pouco de oído ou de afinación” tal como afirma Beatriz Freijido, axudante da coordinadora, quen engade que “a maior parte da xente que se apunta non sabe nada de música, só ensaia as partituras e aprende de oído ou lendo”.

27/11/2007

A Escola Universitaria CEU de Maxisterio celebra o seu 50 aniversario

• Vigo
• Institucional

Coincidindo coa festividade do día do mestre, a Escola Universitaria CEU de Maxisterio celebra as súas vodas de ouro reunindo a antigos alumnos e profesores deste centro durante os últimos 50 anos. Centro adscrito á Universidade de Vigo, este escola imparte dúas titulacións, mestre na especialidade de Educación Infantil e mestre na especialidade de Educación Primaria. O acto, que comezará na propia escola ás 12.15h, enmárcase dentro dun programa máis amplo de actividades que a Escola Universitaria CEU de Maxisterio ten previsto para conmemorar o medio século do docencia.

26/11/2007

O Premio Ángeles Durán galardoará aos mellores traballos de innovación científica no estudo das mulleres e o xénero

• Vigo
• Investigación

A Universidade Autónoma de Madrid, a través do Instituto Universitario de Estudos da Muller, organiza a terceira edición do Premio Ángeles Durán de innovación científica no estudo das mulleres e o xénero.
Este certame, que se convoca cada dous anos, ten como finalidade fomentar o avance do coñecemento feminista, incentivar a creatividade teórica e metodolóxica e impulsar a calidade da investigación para garantir o cambio social.
O prazo de presentación dos traballos péchase o vindeiro 31 de xaneiro de 2008 e poderán concorrer todos aqueles que teñan elaborado, individual ou colectivamente un traballo de investigación en calquera disciplina académica.

26/11/2007

A estrea do documental “Augas vivas de Galicia” será o prato forte da Semana Internacional de Cine Submarino

• Vigo
• Cultura

A estrea do documental Augas vivas de Galicia con imaxes inéditas sobre a riqueza fluvial galega será o prato forte da Semana Internacional de Cine Submarino que un ano máis, e van xa dezasete, achegará a Vigo as mellores producións sobre o mundo submarino dende diferentes perspectivas e baixo o ollo de directores e produtores de diversas nacionalidades. O evento, que se desenvolverá do 28 ao 30 deste mes no Centro Cultural Caixanova e no campus, presentouse este luns no Edificio Miralles.

26/11/2007

Segunda vitoria da tempada para o Universidade de Vigo de Rugby

• Vigo
• Deportes

Universidade de Vigo de Rugby e Oviedo enfrontáronse esta fin de semana na cidade asturiana nun partido importante para ambos equipos, necesitados de puntos por atoparse nos últimos postos da táboa. O encontro estivo dominado en todo momento polos homes de Babini que, pese a acudir ao enfrontamento con varias baixas e perder a Diego por unha lesión na primeira metade, xa gañaban no descanso por 5-15 e remataron o partido cunha vantaxe de 23 puntos. A clave do éxito residiu no bo xogo levado a cabo pola dianteira viguesa.

26/11/2007

Vigo será durante toda a semana a capital internacional da automatización industrial

• Vigo
• Académica

O alto grao de consolidación e a dimensión internacional que as Xornadas sobre Tecnoloxías e Solucións para a Automatización Industrial adquiren na súa terceira edición son os aspectos que Salustiano Mato, director xeral de I+D+i da Xunta de Galicia, destacou durante a súa participación no acto de apertura destas conferencias, que teñen lugar no auditorio do Centro Social Caixanova. Segundo as súas propias palabras, “as xornadas do 2007 superan os obxectivos das anteriores ao tratar de aportar un punto de globalización con experiencias doutras partes do mundo”.
As xornadas teñen como tema central a automatización industrial, unha tecnoloxía imprescindible para o control de procesos.

26/11/2007

Fernando Rosas defende a Lei da Memoria Histórica como un paso importante cara á maduración da democracia española

• Vigo
• Cultura

É tal a relevancia que Fernando Rosas, Catedrático de Historia Contemporánea na Universidade Nova de Lisboa e Deputado polo Bloco de Esquerdas, atribúe ao recordo do pasado que entende que “a Lei da Memoria Histórica é un paso de capital importancia para a maduración da democracia española”, tal como afirmou nunha conferencia ofrecida na Facultade de Filoloxía e Tradución. O profesor Rosas entende a memoria como un proceso social de construción dos discursos de lexitimación do presente, unha baza que usamos para xustificar as decisións e actos que queremos levar a cabo no presente.

23/11/2007

O laboratorio ibérico de nanotecnoloxía, unha oportunidade para os novos investigadores

• Vigo
• Investigación

O laboratorio ibérico de nanotecnoloxía que se construirá en Braga volveu, esta semana, a cobrar protagonismo con motivo da celebración na cidade lusa, da Conferencia de Alto Nivel en Nanotecnoloxía .
O centro, primeiro de investigación compartido entre España e Portugal, considera Luis Liz, responsable do grupo de investigación de Nanopartículas e Nanoestructuras da Universidade que Vigo intregrado na Rede Galega de Nanomedicina, "será nesta zona un importante impulso para investigadores novos". Unha apreciación que coincide co expresado polos responsables políticos que esta semana se deron cita en Braga onde manifestaron o seu convencemento en que o laboratorio será crucial para a creación dun espazo onde Europa liderará a investigación nanotecnolóxica.

23/11/2007

O curso de iniciación ao rugby remata cun salientable éxito de participación

• Vigo
• Deportes

Un total de doce equipos tomarán parte este sábado no II Torneo de Rugby a Sete, que porá punto final ao curso de iniciación a este deporte que se desenvolveu nas pasadas semanas. Conxuntos galegos e portugueses, tanto en categoría masculina como feminina tomaran parte nesta actividade que se desenvolverá o sábado no campo herba natural do campus de Vigo. Pola súa banda, o Universidade de Vigo de Rugby da División de Honra B xoga este domingo en Oviedo un encontro que se presente como de gran importancia para poder abandonar a penúltima praza.

 

23/11/2007

En prol da creación de obras en español no ámbito da cultura científica e tecnolóxica

• Vigo
• Investigación

Co obxectivo de promover a creación de difusión de obras de calidade escritas en español no ámbito da cultura científica e tecnolóxica, convocouse a 3ª edición do premio de ensaio da Fundación Española para la Ciencia y la Tecnología, FECYT, Esteban de Terrreros. 10.000 euros é a dotación económica do galardón que ten carácter panhispánico e está dirixido a autores que utilizan o español como lingua de expresión en ciencia e tecnoloxía. As obras presentadas poderán inscribirse en calquera área de coñecemento e terán que ser orixinais e inéditas, compatibilizando o rigor científico e a claridade expositiva coa pretensión de chegar a un público amplo.

23/11/2007

Un xantar cómico no Centro Comercial

• Vigo
• Cultura

Unha nariz de paiaso e moito sentido do humor. Estas son as ferramentas de traballo de La Máscara que foron suficientes para arrancar moitas gargalladas entre plato e plato na súa actuación destes xoves no Centro Comercial de Cidade Universitaria.
Dentro da programación de teatro de rúa da Vicerreitoría de Extensión Cultural e Estudantes, La Máscara animou o xantar aos asistentes co seu espectáculo Marcelopuntomime.

22/11/2007

Fran Alonso defende en Filoloxía a desmitificación da literatura

• Vigo
• Cultura

“Hai que desmitificar a literatura. Estou totalmente en desacordo coa afirmación de que a literatura é algo imprescindible”, así iniciou o escritor Fran Alonso a súa intervención no ciclo “Escritores na Universidade”. O obxectivo: deixar claro que “non antepoño en ningún caso a literatura á vida”.
Alonso (Vigo, 1963) definiuse a si mesmo coma un escritor vocacional que chegou á literatura “simplemente porque me gustaba”.

22/11/2007

Ana Fernández Pulpeiro será proposta como nova xerente da Universidade de Vigo

• Vigo
• Institucional

Ana Fernández Pulpeiro será proposta polo Reitor da Universidade de Vigo, Alberto Gago, como nova xerente da institución académica en sustición de Antón Vidal, que ocupa provisionalmente o cargo trala marcha de Manuel Castro o pasado mes de abril. A designación da persoa que se encargará da Xerencia ten, como afirma o Reitor "unha tramitación longa xa que ten que ser primeiro aprobada polo Consello de Goberno e a continuación sometida ao Consello Social". A proposta para designar a Ana Fernández Pulpeiro xerente da Universidade de Vigo será trasladada, o vindeiro día 18 de decembro, polo Reitor ao Consello de Goberno. Unha semana máis tarde, concretamento o día 27, será o Consello Social o que aborde a proposta.
Fernández Pulpeiro que actualmente desempeña o cargo de directora xeral de Recursos Económicos do SERGAS, exercera desde o ano 2002 na Universidade de Vigo, como directora da Área de Calidade.

22/11/2007

Pedro Membiela afirma que os docentes "debemos sentirnos orgullosos da nosa profesión"

• Vigo
• Académica

Tras tinta anos exercendo a docencia, o vicerreitor de Formación e Innovación Educativa Pedro Membiela, defendeu ante os asistentes ao curso de iniciación á formación para a docencia universitaria “o orgullo de ser profesor”.Membiela que asegurou que xa cando estudaba bacharelato quería ser profesor, definiu a docencia como “unha gran profesión, moi satisfactoria a nivel persoal e moi comprometida”.
Ante os asistentes ao curso Membiela defendeu a personalización da docencia xa que considera “ás veces actuamos dun xeito impersoal cos alumnos, e si é importante ensinar ben, tamén é unha relación entre persoas”. Advirte ,sen embargo, o vicerreitor que “a personalización fai máis complicada unha profesión que traballa moito con perfiles e alumnos tipo”.

22/11/2007

Os modelos matemáticos constitúen unha nova e importante ferramenta para predicir a propagación dos incendios forestais

• Vigo
• Investigación

Os modelos de simulación matemática constitúen unha ferramenta nova e efectiva para predicir a evolución do lume nos incendios forestais. Para potenciar as liñas de investigación neste campo e poñer en valor estes modelos de simulación, a vindeira semana no campus de Vigo celebrarase un workshop sobre Modelización matemática e simulación numérica da propagación de incendios forestais.
O obxectivo final é traballar cun código matemático que, en función das condicións do terreo e a climatoloxía, permita simular nun ordenador en tempo moi reducido a evolución do foco de lume. Este sería de gran importancia á hora de tomar as decisións precisas en cada momento para a extinción e para a planificación forestal do terreo. O congreso contará tamén con representantes da administracion galega para sensibilizalos e explicarlles o funcionamento e oportunidades que ofrecen estes programa na extinción e planificación forestal.

22/11/2007