Novas do DUVI

Cinco bolsas Ourense Exterior para fomentar a internacionalización dos mestrados do campus

• Ourense
• Estudantes

Entre as diferentes fórmulas que ten o alumnado estranxeiro para realizar unha estadía no campus de Ourense está cada curso a convocatoria de bolsas de mobilidade internacional Ourense Exterior. Ao seu abeiro, estudantes foráneos poden realizar de xeito subvencionado un dos mestrado que ofertan as facultades e escolas deste campus da Universidade de Vigo. As cinco persoas beneficiarias este curso, orixinarias de países como Nova Zelandia e Italia, xa están incorporadas aos seus estudos, potenciando coa súa participación a faciana máis internacional do campus.

17/10/2016

O Programa Universitario de Maiores conta este curso con 175 estudantes no campus

• Ourense
• Estudantes

Entre o alumnado que este curso realiza os seus estudos no campus de Ourense está o alumnado sénior, as persoas con máis de 55 anos de idade que están matriculadas no Programa Universitario de Maiores. Este curso 2016/2017 a súa cifra ascende a 175 persoas, 100 no primeiro ciclo, o intensivo, e 75 no segundo, o integrado. Un 68% destes estudantes, 118, son mulleres. Os estudantes sénior fóronse incorporando paulatinamente nas últimas semanas ás aulas ata estar hoxe en día “a pleno rendemento”, tal e como sinala Alberto Vaquero, coordinador do Programa Universitario de Maiores no campus ourensán.

14/10/2016

Buscando contos libres de sexismo

• Ourense
• Estudantes

Facilitar un espazo para a abordaxe da literatura infantil e da tradición oral dende unha perspectiva feminista, onde "cuestionar os modelos hexemónicos nos que se sosteñen as relacións de poder e as desigualdades sociais". Adestrar as competencias comunicativas e facilitar a creación e a interpretación de historias evitando a discriminación de xénero e "promovendo olladas diversas e inclusivas nos contidos e na forma". Con este dobre obxectivo, o campus de Ourense acollerá do 21 de outubro ao 5 de novembro o curso Contos con senso: contos con perspectiva de xénero.

10/10/2016

Uva a uva, facendo a vendima

• Ourense
• Estudantes

Na provincia de Ourense como en tantos outros puntos da xeografía do país outubro é tempo de vendima. Co obxectivo de que os máis pequenos e pequenas coñezan e participen desta tradición e tamén do outono, o alumnado da Escola Infantil do campus de Ourense realizou este venres a súa particular vendima despois de toda unha semana de actividades nas que se familiarizaron coas vides, os acios e as uvas e os empregaron para desenvolver as súas habilidades sensoriais e de psicomotricidade. Foi unha xornada diferente na súa rutina diaria e sobre todo unha actividade moi divertida que lles permitiu enzoufarse todo o que quixeron.

07/10/2016

Sete opcións para rachar os límites persoais

• Ourense
• Estudantes

Saber relaxarse, xestionar mellor o tempo, empregar as técnicas de meditación para ser máis creativos, desenvolver a intelixencia emocional, mellorar a autoestima... Todas estas accións contribúen a que as persoas incrementen a súa calidade de vida persoal e profesional e contribúan a mellorar a dos demais. Son tamén, explican desde o Gabinete Psicopedagóxico do campus de Ourense, aspectos sobre os que os membros da comunidade universitaria poden e deben formarse. Con este obxectivo, este curso académico este servizo ofrecerán un ano máis non só atención individualizada senón tamén un amplo abano de cursos e obradoiros.

26/09/2016

Alumnado e egresados argallan as I Xornadas de Tempo Libre

• Ourense
• Estudantes

Os días 6 e 7 de outubro a Facultade de Ciencias da Educación do campus de Ourense acollerá as I Xornadas de Tempo Libre. Organizadas por estudantes e egresados, a cita ten como obxectivo ser un punto de encontro entre entidades e profesionais do sector do tempo libre e persoas que están empezando ou que queren empezar a desenvolverse neste eido. Para conseguilo, o programa propón aos asistentes dous días de conferencias, sesións prácticas, actividades e lúdicas e traballo en común. A entrada é gratuíta e libre ata completar aforo.

22/09/2016

34 estudantes de 12 países traen a diversidade cultural ás aulas ourensás

• Ourense
• Estudantes

Proceden de países tan diversos como México, Cora do Sur ou Francia e polo tanto teñen idiomas, culturas e formacións moi diferentes. Porén, a partir de agora si haberá algo que terán o común, que todos eles e elas, 34 estudantes procedentes de 12 países, escolleron o campus de Ourense para estudar o primeiro cuadrimestre ou todo o curso. Este venres celebrouse o acto de benvida ao alumnado estranxeiro de intercambio que neste curso 2016/2017 traerá a diversidade cultural ás aulas ourensás. Por nacionalidades, o principal país de procedencia deste alumnado é Francia.

09/09/2016

Entidades lusas acollen as prácticas no eido social e educativo de 12 titulados e tituladas

• Ourense
• Estudantes

O pasado mes de xullo, por segundo ano consecutivo, a Asociación Educación Social e Sociedade (Auce), formada por estudantes e egresados da Facultade de Ciencias da Educación do campus de Ourense, realizou unha convocatoria para participar nun programa de prácticas en Lisboa. Ao abeiro desta iniciativa, doce persoas menores de 30 anos con perfil e formación na área social ou educativa están a desenvolver unha experiencia de mobilidade formativa e profesional en diferentes organizacións e entidades da capital lusa. A estadía prolongarase ata novembro.

05/09/2016

O tempo libre, fonte de formación e emprego no verán

• Ourense
• Estudantes

Nunha época na que o alumnado universitario está de vacacións e as aulas baleiras, no campus de Ourense hai un grupo de estudantes que cada día continúa acudindo a formarse nel. Trátase das 25 persoas inscritas na edición de xullo do Curso de Monitor de Tempo Libre, ofrecido pola Escola de Tempo Libre Universitaria do campus de Ourense coa colaboración da Asociación Universitaria de Ciencias da Educación AUCE. Cun enfoque principalmente práctico e orientado á empregabilidade dos participantes, a iniciativa permite a estudantes e egresados de diferentes titulacións aprender a dinamizar todo tipo de colectivos, desde menores ata maiores.

19/07/2016

Auce selecciona a 12 persoas para facer prácticas no eido social ou educativo en Lisboa

• Ourense
• Estudantes

Por segundo ano consecutivo, a Asociación Educación Social e Sociedade (Auce), formada por estudantes e egresados da Facultade de Ciencias da Educación do campus de Ourense, levará a cabo un programa de prácticas en Lisboa. Para facelo, busca 12 persoas menores de 30 anos con perfil e formación na área social ou educativa interesadas en desenvolver unha experiencia de mobilidade formativa e profesional en organizacións e entidades da capital lusa durante catro meses, de xullo a novembro deste ano. Os beneficiarios e beneficiarias desta iniciativa, que se realiza ao abeiro do Programa Galeuropa da Xunta de Galicia, terán apoio económico para a cobertura dos gastos.

05/07/2016

Remata a etapa de estudantes pero comeza o soño de ser mestres

• Ourense
• Estudantes

O alumnado da cuarta promoción do Grao de Educación Infantil e da cuarta promoción do Grao de Educación Primaria da Facultade de Ciencias da Educación pecharon este sábado os actos de graduación deste curso no campus de Ourense. 67 estudantes de último curso de Educación Primaria e 80 de Infantil recolleron as súas bandas e diplomas entre o aplauso de familiares e membros da comunidade universitaria e coa ilusión de acadar a meta para a que traballaron durante os últimos catro anos. “Xa sodes mestras e mestres. Que gran responsabilidade pero que profesión tan fermosa!, díxolle Mar García, decana do centro, aos novos egresados e egresadas.

27/06/2016

Unha nova promoción de graduados 'júnior' despídese do campus

• Ourense
• Estudantes

Entre os actos de graduación que estas semanas se suceden no campus de Ourense este xoves chegoulle o momento ao alumnado “júnior”, aos rapaces e rapazas de último curso da Escola Infantil universitaria. Perfectamente inmortalizados polas cámaras dos pais, nais e demais familiares presentes, os 34 nenos e nenas de dous a tres anos que forman parte deste grupo recolleron os seus agasallos, con diploma e barrete incluído, como premio a un curso que remata e como despedida dun centro no que a maioría empezou a acudir diariamente con só uns meses de vida e que para eles é un lugar moi familiar.

23/06/2016

Para os que soñan con ser enxeñeiros ou enxeñeiras aeroespaciais...

• Ourense
• Estudantes

Coas notas de selectividade xa publicadas, é tempo para o alumnado preuniversitario de decidir que estudar exactamente e onde facelo. Para aqueles cuxo soño está no espazo, a Universidade de Vigo comezará a impartir o vindeiro curso académico 2016/2017 o Grao de Enxeñaría Aeroespacial no campus de Ourense. Dado que é unha titulación nova no sistema universitario galego, este martes celebrouse unha xornada aberta de presentación na que as persoas interesadas tiveron a oportunidade de coñecer de primeira man as características destes estudos e as súas saídas profesionais. A todos eles e elas, os responsables da Escola de Enxeñaría Aeronáutica e do Espazo que acolle esta titulación salientaron que os novos estudos nacen “con todas as garantías” tanto en recursos humanos coma materiais. Con toda a planificación realizada, recalcaron, só falta coñecer os nomes das 50 persoas que en setembro iniciarán esta titulación.

21/06/2016

Catro novas promocións para dar alento á ciencia galega

• Ourense
• Estudantes

Este venres celebrou o remate dos seus estudos alumnado de último curso de grao e de mestrado da Facultade de Ciencias do campus de Ourense. Rodeados de membros da comunidade universitaria, familiares e amigos recolleron os froitos do seu esforzo 33 estudantes da terceira promoción do Grao en Ciencias Ambientais; 17 da terceira promoción do Grao en Enxeñaría Agraria; 9 da cuarta promoción do Grao en Ciencia e Tecnoloxía dos Alimentos e 12 da terceira promoción do Mestrado en Ciencia e Tecnoloxía Agroalimentaria e Ambiental.

17/06/2016

Representantes de estudantes reclaman a entrada deste colectivo no Consello Galego de Universidades

• Ourense
• Estudantes

Incluír representación estudantil no Consello Galego de Universidades; a posibilidade de designación directa do presidente do Consello de Estudantes como representante no Consello Social e a aplicación do prezo reducido de 20 euros ás materias onde só exista dereito a exame tamén para as titulacións adaptadas ao Espazo Europeo de Educación Superior. Estas son as tres reclamacións principais que os representantes de estudantes da Universidade de Vigo están a trasladar a diferentes axentes cos que se veñen reunindo nas últimas semanas co obxectivo de mellorar a situación do colectivo que representan.

14/06/2016