Novas do DUVI

Case 200 novos profesionais 'imprescindibles' para unha sociedade en pleno cambio

• Ourense
• Estudantes

A sociedade está a cambiar a un ritmo vertixinoso. A crise rachou o modelo de economía e sociedade imperante e na busca de solucións urxentes e novas fórmulas de futuro todo muda dun xeito rápido e impredecible. Neste novo marco de incertezas pero tamén de oportunidades terán que desenvolverse como profesionais os case 200 novos titulados dos graos de Administración e Dirección de Empresas, Turismo e Traballo Social do campus de Ourense que este venres celebraron o seu acto de graduación. Eles e elas buscarán o seu oco en dous eidos moi diferentes pero directamente relacionados e fundamentais, como son o mundo económico e empresarial e os sectores sociais máis desfavorecidos.

29/05/2015

20 promocións de educadores sociais chamadas a reunirse en Lodoselo

• Ourense
• Estudantes

No curso 1994/1995 botou a andar na Facultade de Ciencias da Educación do campus de Ourense a por aquel entón diplomatura e hoxe en día grao de Educación Social. 20 anos despois, as promocións que cada ano foron saíndo das súas aulas e as que aínda están estudando nelas están chamadas a reunirse a finais de xuño en Lodoselo. Este pobo escola trae para a maioría destes egresados moi bos recordos da época universitaria, xa que cada ano é unha das prácticas de campo preferidas polo alumnado. A cita quere reunir a unha boa representación dos arredor de 1500 educadores e educadoras sociais que forman parte destas 20 promocións para lembrar vellos tempos.

28/05/2015

6000 horas de formación para ser os mellores enfermeiros e enfermeiras

• Ourense
• Estudantes

O curso académico 2014/2015 está na súa recta final e é tempo de celebrar o remate dos estudos, sobre todo para aqueles que despois de anos de esforzo e traballo finalizan as súas titulacións. Este venres, a segunda promoción do grao de Enfermaría celebrou o seu acto de graduación. Son 38 novos profesionais, practicamente todo mulleres, que comezan unha nova etapa vital na que agardan poder levar á práctica todo o aprendido durante os seus catro anos de formación e 6000 horas de aprendizaxe desenvolvidos na Escola Universitaria de Enfermaría de Ourense. Os responsables académicos presentes destacaron o esforzo feito por estes novos profesionais.

22/05/2015

En familia e en galego

• Ourense
• Estudantes

O 15 de maio é o Día Internacional da Familia e o 17 de maio é o Día das Letras Galegas. Dúas datas sinaladas no calendario que este venres os nenos e nenas e o persoal da Escola Infantil Concepción Saiz Otero quixeron conmemorar con diferentes actividades. Cuns meses de vida ou apenas un, dous ou tres anos, algúns destes rapaces aínda non falan, outros están coas súas primeiras verbas e outros xa empezan a controlar a linguaxe pero todos eles e elas saben moi ben ou intúen xa que palabras como papá, mamá, avó e avoa, ditas en galego ou en castelán, son fundamentais. A Biblioteca Rosalía de Castro tamén se uníu a esta celebración a través de varios dos seus recunchos temáticos.

15/05/2015

Os temas sociais fálanse en... Radio Fedello

• Ourense
• Estudantes

Unha radio social, plural e aberta onde caben todos os proxectos e persoas que queiran falar e expresarse. Con esta filosofía comezou a andar este curso Radio Fedello, unha iniciativa posta en marcha pola Asociación Universitaria de Ciencias da Educación AUCE. O seu obxectivo é ser un espazo radiofónico que traia ao campus e que dea voz ás entidades sen ánimo de lucro da contorna, que son convidadas a participar activamente na creación e emisión dos contidos desta canle, que se pode escoitar a través de Internet. Millán Brea, educador social, e Serxio Souto, estudante de Educación Social son dúas das voces que están detrás deste proxecto.

11/05/2015

Un grazas para Carmen Pereira no seu último día impartindo clase

• Ourense
• Estudantes

A maior satisfacción para calquera docente é ir deixando un pouso en cada un dos seus alumnos e alumnas, un pouso que lles axude a ser mellores profesionais e mellores persoas. Carmen Pereira, docente da Facultade de Ciencias da Educación do campus de Ourense, puido comprobar este mércores como ela si é un destes profesores para os seus estudantes. Alumnos e antigos alumnos seus sorprendérona cunha pequena homenaxe no que foi o seu último día impartindo clases antes da súa xubilación. Angélica Ferro foi a encargada de ler un texto de recoñecemento en nome dos demais presentes no acto.

06/05/2015

Formando persoas para unha sociedade aínda por inventar

• Ourense
• Estudantes

Ser diagnosticado con esclerose múltiple secundaria progresiva mudou a súa forma de ver o mundo e a forma de estar nel, no seu caso tanto como persoa como profesor universitario. Para transmitir aos futuros docentes a súa visión da educación en tempo de grandes cambios, Xulio Fernández Hermida, doutor enxeñeiro en Telecomunicacións e profesor titular da Universidade de Vigo, achegouse este mércores o campus de Ourense. “Nada do vivido por nós lle servirá aos nosos alumnos. A sociedade na que van a vivir e traballar eles será tan diferente que a experiencia previa non será válida”, apuntou o autor da obra Consellos de amigo para alumnos universitarios.

15/04/2015

Tres días 'on line' con 360 persoas

• Ourense
• Estudantes

O seu obxectivo é pasalo ben co que máis lles gusta facer: xogar en rede. A Technium Lan Party 2015 arrancou este venres no campus de Ourense cos seus 360 postos ocupados por outros tantos amantes das novas tecnoloxías. Co necesario para sobrevivir durante a fin de semana, os máis madrugadores xa chegaron este venres ao Pavillón de Deportes universitario cos seus equipos. Por diante teñen moitas horas intercambiando arquivos, xogando, navegando, coñecendo xente afín e sobre todo divertíndose tanto no mundo real coma no virtual. Esta gran 'quedada' informática está organizada pola Asociación Sectorial de Estudantes de Enxeñaría Informática.

10/04/2015

Tres xeracións de pura enerxía

• Ourense
• Estudantes

Pura enerxía. Iso é o que desprendían as preto de 200 persoas que este xoves se deron cita na Praza Maior de Ourense para participar nas XII Xornadas Interxeracionais. Maiores, estudantes universitarios e escolares xuntáronse para, a través do xogo e a convivencia, divertirse e vivir unha experiencia diferente e enriquecedora para todos. Son poucas as ocasións nas que, fóra do contexto familiar, xeracións tan diversas poden relacionarse polo que, roto o xeo inicial, cada un dos participantes aproveitou ao máximo esta oportunidade. As xornadas enmarcáronse dentro do programa da II Semana da Promoción Social.

09/04/2015

Prohibido parar de aprender, nin pola xubilación nin pola graduación

• Ourense
• Estudantes

O inicio dos actos de graduación marcan no campus o comezo da recta final do curso académico. Este ano os máis madrugadores foron os alumnos e alumnas do Programa de Maiores das Aulas de Formación Abertas. 24 estudantes da décima promoción de graduados sénior e da sétima e oitava promoción de graduados superiores sénior celebraron este mércores o fin dun ciclo acompañados de membros da comunidade universitaria, familiares e compañeiros de aula. Cada un deles recolleu o seu diploma baixo a consigna de que no seu caso non poden nin queren permitirse parar de aprender. Non o fixeron trala súa xubilación e non o farán agora trala súa graduación.

08/04/2015

Que se coce no eido da intervención social?

• Ourense
• Estudantes

Nunha sociedade en permanente cambio, os traballadores e educadores sociais están obrigados a actualizar cada certo tempo as súas metodoloxías e o abano de servizos que prestan e colectivos que atenden. Por este motivo, e co obxectivo de coñecer as últimas novidades no eido da intervención social, alumnado dos graos de Traballo e Educación Social do campus de Ourense celebrarán do 6 ao 9 de abril a II Semana da Promoción Social. Nela, e dan man de diferentes entidades e profesionais do sector, afondarase en temas de actualidade, como a situación da muller xitana e dos menores transexuais, e en novas metodoloxías, como o teatro do oprimido.

27/03/2015

As novas tecnoloxías dominan os niños da incubadora universitaria

• Ourense
• Estudantes

Aplicadas ao mundo do agro, á vida profesional ou mesmo ao tempo de lecer, as novas tecnoloxías van gañando terreo no día a día e xeran nichos de mercado suficientes para que agromen novas iniciativas empresariais, como ocorre con iBeeAgro, MeigaLabs ou Traster, os proxectos gañadores xunto con Consultoría Deportiva da 4ª dos Premios Incuvi Emprende no campus de Ourense. Institucións e entidades colaboradoras acompañaron aos futuros empresarios nunha visita polos dous niños e a sala de coworking da Tecnópole que empregarán durante o vindeiro ano a custe cero para "envolver aos estudantes nunha contorna que lles permita dar forma á súa idea", salientou o reitor, Salustiano Mato.

25/03/2015

Comeza a conta atrás para a Technium Lan Party 2015

• Ourense
• Estudantes

Tras dúas edicións e máis de 350 participantes o ano pasado, a Technium Lan Party 2015 comeza a conta atrás para celebrar un novo encontro con importantes novidades e un claro obxectivo: converterse nunha das LanPartys de referencia a nivel nacional. Con máis actividades e unha previsión de público superior á da pasada edición, esta ‘quedada’ organizada pola Asociación Sectorial de Estudantes de Enxeñaría Informática (ASEII) en colaboración coa Escola Superior de Enxeñaría Informática do campus de Ourense non ten competencia na comunidade galega trala desaparición da XGN de Santiago e da IGN de Lugo.

13/03/2015

A Deputación de Ourense súmase ao proxecto Fórmula Student

• Ourense
• Estudantes

O presidente da Deputación de Ourense, Manuel Baltar, recibiu este martes no Pazo Provincial aos representantes dos alumnos da Escola de Enxeñería Industrial que integran o equipo UVigo Motorsport e comprometeu o apoio da institución provincial no proxecto que desenvolven, referido ao deseño e construción de monoprazas de altas prestacións que compiten en circuítos europeos na Fórmula Student. O presidente do goberno provincial destacou "a importancia do proxecto polo que supón de innovación, tecnoloxía e creatividade, nun ámbito que xunta deporte, internacionalización, xuventude e universidade, valores e elementos que apoia a Deputación de Ourense", explicou Manuel Baltar.

10/03/2015

Había unha vez un circo que aledaba sempre... o campus

• Ourense
• Estudantes

O entroido chegou á Escola Infantil do campus disfrazado de circo. Os rapaces e rapazas do centro aproveitaron estas datas para celebrar a súa particular festa transformados en artistas do gran circo da risa para facer pasar a pais, nais e todos os familiares que os acompañaran unha tarde diferente e entretida. Suspendida a semana pasada por motivos meteorolóxicos, a Escola Infantil retomou este mércores unha función na que non faltou ningún dos protagonistas principais do circo: domadores e pallasos, papel que representaban os nenos e nenas de maior idade do centro, compartiron escenario cos leóns encarnados polos máis pequenos.

19/02/2015