Novas do DUVI

Gran variedade de nacionalidades entre os 61 estudantes estranxeiros deste curso no campus de Ourense

• Ourense
• Estudantes

Non é o campus máis numeroso pero si o máis multicultural no que a estudantes estranxeiros se refire. Así o explicaron representantes da Oficina de Relacións Internacionais da Universidade de Vigo durante o acto de benvida dos alumnos e alumnas doutros países. Nste curso 2014-2015 Ourense acolle a 61 dos 557 estudantes totais matriculados nos tres campus, unhas cifras que marcan máximos históricos de recepción de alumnado foráneo para a universidade viguesa. Aos 21 estudantes que se incorporan ao campus este segundo cuadrimestre, súmanselle os 31 que estiveron no primeiro cuadrimestre e os 9 que alongan a súa estadía durante todo o curso.

20/01/2015

Concedidas once bolsas de aloxamento para estudantes do campus

• Ourense
• Estudantes

A Universidade de Vigo acaba de publicar a listaxe definitiva cos alumnos e alumnas do campus de Ourense aos que se lles concedeu algunha das 35 bolsas de aloxamento convocadas pola Vicerreitoría de Extensión Universitaria e Relacións Internacionais para paliar os gastos de residencia de aqueles estudantes que non teñen o seu domicilio habitual na cidade das Burgas e que, ao mesmo tempo, teñen rendas familiares baixas. Das 86 solicitudes presentadas, concedéronse un total de once axudas, xa que o resto non se axustaban aos requerimentos establecidos. Máis do 65% das rexeitadas non foron admitidas por superar o límite de renda ou de patrimonio marcado nas bases.

16/01/2015

Moreas de castañas e galletas na visita do Apalpador á Escola Infantil

• Ourense
• Estudantes

Cun burriño da sabana e camiño de Belén arrincaba a festa de Nadal na Escola Infantil do campus, coa que este venres quixo agasallar ás familias dos nenos e nenas do centro e adiantar un pouco os festexos destas datas. Cos pais, nais, avós e avoas xa nos seus postos, sentados en cada recuncho e coas cámaras preparadas, levantouse o pano para dar paso á mellor actuación musical da xornada: os máis cativos e cativas cantando a coñecida panxoliña mentres tocaban tambores e maracas, uns instrumentos feitos por eles mesmos na cada coa axuda das súas familias. O escenario, o ideal: Xosé, María e Xesusa no presebe rodeados de burriños cantareiros.

19/12/2014

O Nadal fai aflorar o talento dos maiores

• Ourense
• Estudantes

Música, cantigas, panxoliñas, contos, poemas... Toda unha variedade artística coa que os veteranos do campus de Ourense quixeron celebrar este mércores o seu propio festival de Nadal. Organizado pola Asociación da Aula de Maiores presidida por José Antonio Golpe, con este concerto multidisciplinar os alumnos e alumnas do Programa de Maiores quixeron despedir o ano e compartir unhas horas xuntos antes das vacacións de Nadal. Preto dun cento de persoas acompañaron aos artistas durante as súas actuacións na sala de música do Edificio de Ferro. Ao remate, panxoliñas espontáneas no público e moita ledicia por compartir ese tempo de lecer.

18/12/2014

Facilitar un traballo duro pero emocionante, o de emprendedor

• Ourense
• Estudantes

Por moi boa que sexa a idea de negocio que se ten, son moi poucos os que se atreven a dar o paso definitivo e poñer en marcha novos proxectos empresariais. E os número non axudan, xa que falan dunha alta mortalidade entre as novas empresas no seu primeiro ano de vida. Para combater esas estatísticas e fomentar o espírito emprendedor no colectivo universitario, chega a cuarta edición dos Premios Incuvi-Emprende da Universidade de Vigo, que por primeira vez se leva a cabo nos tres campus simultaneamente e que foron presentados ao alumnado ourensán este martes no Edificio Xurídico-Empresarial por representantes da Universidade e do tecido empresarial de Ourense.

16/12/2014

Doa o teu tempo e voluntarízate!

• Ourense
• Estudantes

Achegar algo de un mesmo á sociedade, comprometerse, converter a solidariedade nunha forma de vida... esas son moitas das características que comparten os voluntarios, aquelas persoas que dedican parte do seu tempo a unha acción altruísta e non remunerada. A Universidade de Vigo tamén quere achegar o seu grán de area e por iso a Oficina de Voluntariado do campus de Ourense colabora dende hai tempo con diferentes institucións en 18 programas. “Na comunidade universitaria ser voluntario é cíclico, sobre todo pola época de exames”, recoñece a súa responsable, Rosa María Guerra, quen fai un chamamento a alumnado, PDI e PAS a doar un par de horas á semana.

03/12/2014

A Universidade trunfa no 14º Concurso de Proxectos Tecnolóxicos

• Ourense
• Estudantes

Innovación, talento e orixinalidade nos premios da 14º edición dos Concurso de Proxectos Tecnolóxicos que organiza Expourense en colaboración coa Escola Superior de Enxeñaría Informática do campus de Ourense, que nesta ocasión aglutinou a titulados das escolas de Informática e Telecomunicación das tres universidades galegas e na que a de Vigo tivo un especial protagonismo ao facerse con cinco dos oito premios que se outorgaban. Rocío Moure e Rubén Viso, estudantes de Enxeñaría de Telecomunicación nos campus de Vigo e do grao de Enxeñaría Informática de Ourense respectivamente, foron os gañadores dos primeiros premios nas dúas modalidades nas que está dividido o certame.

02/12/2014

Gozar da xubilación entre apuntamentos e libros

• Ourense
• Estudantes

Moitos son viúvos, viven sos ou están a pasar unha situación laboral delicada, con máis de 55 anos e a crise económica aínda enriba, por iso atopan nas aulas “unha motivación, algo co que encher o noso tempo”. “E, sen querer, descubrimos que todos somos distintos pero que podemos gozar dunha convivencia nova, menos gregaria... e iso humanamente enriquece moito”. Así explica José Miguel Martínez a súa experiencia no Programa de Maiores do campus de Ourense, dirixido polo profesor Alberto Vaquero e que este 2014/2015 conta con preto de 220 matriculados repartidos en cinco cursos académicos, dos que 81 son do Ciclo Intensivo e 137 do de Especialización.

28/11/2014

Posta de largo para oito historiadores emerxentes

• Ourense
• Estudantes

Son moitos os autores que falan do exército exipcio na Antigüidade como un grupo desorganizado e caótico no que nada tiña orde nin concerto. Sen embargo, despois de varios meses de investigación e moita bibliografía lida, para Marián Ferro a intendencia exipcia da época “non era como a romana, pero realmente si estaba organizada e tiña armaduras”. Son as conclusións do seu traballo fin de grao, no que analizou a evolución deste exército dende o reino antigo ata a chegada de Alejandro Magno e que agora defende nas IV Xornadas Novos Investigadores, un escaparate no que entre onte e hoxe oito especialistas en Historia, Arte e Xeografía dan a coñecer os seus proxectos de investigación.

26/11/2014

Trendon.me, unha plataforma global de moda con selo ourensán

• Ourense
• Estudantes

Ninguén a tomaba en serio cando daba renda solta á súa principal afección, a moda. Pero lonxe de renderse, Nuria Iglesias, enxeñeira de formación, decidiu dar un paso máis e demostrar que de paixón tamén se vive. Foi así como naceu Trendon.me, unha plataforma global de moda “cun espazo para adictos ás últimas tendencias, blogueiros, deseñadores emerxentes e tendas, unha especie de ecosistema onde todos eles poidan comunicarse e vender os seus produtos”. Despois dun ano traballando de cheo no proxecto, Trendon.me vén de trasladarse a un dos niños da preincubadora universitaria do campus de Ourense, Piuvi-Ou Tecnópole.

10/11/2014

Saír da zona de confort e aventurarse, as claves para mergullarse no mundo laboral

• Ourense
• Estudantes

Ten 23 anos, leva un fóra da casa e só está en España pasando un par de meses “de vacacións e relax” antes de mergullarse nunha nova aventura profesional: subdirixir un gran complexo hoteleiro de 1000 habitacións en Cabo San Lucas, México. Cando Alba Regueiro rematou a carreira o curso pasado nin imaxinaba que a maior oportunidade laboral estaba esperándoa na propia Facultade de Ciencias Empresariais e Turismo. “O director de Recursos Humanos de RIU Hotels&Resorts estaba facendo entrevistas no centro. Presenteime, seleccionáronme e dixéronme que tiña que marchar a México o antes posible”, asegura. Aí comezou a súa aventura.

05/11/2014

Reprogramar o noso software mental para facer os soños realidade

• Ourense
• Estudantes

Expectativas, desexo e motivación. Son os tres conceptos clave que se deben traballar para facer os soños realidade, tres ideas que Pepe Cabello trasladou aos 70 participantes do Curso de Motivación de Alto Impacto, impartido este xoves no campus de Ourense co obxectivo convencer aos presentes de que os medos poden vencerse e de que conseguir os obxectivos vitais é unha cuestión de mentalidade. “Unha correcta harmonía destes conceptos permite que os seres humanos consigamos as nosas metas e que esteamos motivados, enchufados coa vida. Pero cando un deles está desequilibrado é cando pasamos a vida sufrindo, frustrados, sen conseguir cousas...”, advertiu.

30/10/2014

Máis de 70 matriculados nas I Xornadas de achegamento ao software libre no ámbito educativo

• Ourense
• Estudantes

Aprender a instalar e manexar programas libres, sobre todo no eido da ensinanza, é o obxectivo co que esta semana se celebran no campus de Ourense as I Xornadas de achegamento teórico-práctico ao software libre no ámbito educativo, unha actividade organizada pola Asociación Informática Lignux e a universitaria Educere coa colaboración das delegacións de alumnado da Facultade de Ciencias da Educación e a Escola de Enxeñaría Informática.Con máis de 70 persoas matriculadas ,o equipo de organización do encontro amosou a súa satisfacción pola “boa acollida das xornadas, tanto entre o alumnado das dúas escolas como no conxunto da cidade”

07/10/2014

Acento mexicano na benvida ao alumnado internacional

• Ourense
• Estudantes

México, Alemaña, Polonia, Italia, Brasil ou Finlandia. Este martes deuse a benvida aos preto de medio cento de estudantes estranxeiros que elixiron as escolas e facultades do campus de Ourense como destino das súas estadías internacionais. Son 48 mozos e mozas chegados de 14 países, maioritariamente de Europa, pero tamén do outro lado do Atlántico, situándose México como o país que máis estudantes internacionais envía ao campus de Ourense, con máis dunha ducia de alumnos en diferentes centros do campus. O vicerreitor do campus de Ourense, Virxilio Rodríguez, e o de Relacións Internacionais, Manuel J. Fernández, déronlles a benvida.

23/09/2014

Tecendo os primeiros lazos na universidade

• Ourense
• Estudantes

O salto do instituto á universidade é un paso que para na maioría dos estudantes xera moito estrés e algo de vertixe. Hai que abandonar un espazo, uns estudos e uns compañeiros xa coñecidos e de confianza por outros totalmente estraños. Para axudar ao alumnado de primeiro curso do campus de Ourense a dar ese salto nas mellores condicións posibles, o Gabinete Psicopedagóxico organiza estes días obradoiros de traballo e convivencia en grupo. Máis dun cento de estudantes xa participaron neles para comezar a tecer os seus primeiros lazos na Universidade de Vigo. O principal obxectivo desta iniciativa é que os estudantes se coñezan e comecen a relacionarse entre eles.

05/09/2014