Novas do DUVI

Benvida á familia do campus de Ourense

• Ourense
• Estudantes

No campus de Ourense os máis madrugadores foron este curso os alumnos e alumnas de primeiro ano da Facultade de Historia, que foron recibidos no centro cun amplo programa de actividades encamiñadas a que coñeceran tanto os estudos nos que se matricularon como as instalacións universitarias. “Dámosvos a benvida á facultade e sobre todo dámosvos a benvida á pequena familia que nela formamos docentes, persoal de administración e servizos e alumnado. Animámosvos desde o principio a ser activos, a traer novas enerxías a este campus, e felicitámosvos pola elección que fixestes”, díxolle Beatriz Comendador, decana da Facultade de Historia, aos novos universitarios.

01/09/2014

A demanda de servizos do Gabinete Psicopedagóxico duplicouse durante este curso

• Ourense
• Estudantes

O curso académico 2013/2014 está na súa recta final e é tempo para os diferentes servizos universitarios de facer balance e de planificar a súa actividade para 2014/2015. O Gabinete Psicopedagóxico do campus de Ourense é un dos que máis satisfeitos se amosa cos resultados obtidos nesta etapa, pois conseguiu, no seu segundo ano de actividade co novo equipo, consolidar a súa actividade e duplicar a demanda de consultas recibidas e atendidas. “As cifras dan conta de que ofrecemos un servizo moi necesario para a comunidade universitaria, que cada vez coñece máis a nosa existencia”, explica Isabel Ferreiro, responsable deste Gabinete Psicopedagóxico.

26/06/2014

Novo capital humano para a enxeñaría informática e para unha sociedade dixital

• Ourense
• Estudantes

Este curso académico a Escola Superior de Enxeñaría Informática do campus de Ourense acolleu a presentación dun estudo dos colexios profesionais galegos do sector no que destacaban a alta empregabilidade destes profesionais, cun 91,77% traballando; o rápido que atopan o primeiro emprego, unha media de dous meses e medio desde que comeza a busca, e a súa estabilidade, pois o 79,35% ten contrato indefinido. Con estes datos, non é de estrañar que os novos egresados do centro celebrasen este venres o seu acto de graduación coa ilusión que dá saber que eles teñen moitas probabilidades de cumprir realidade o seu soño de exercer para o que se formaron.

20/06/2014

As graduacións tamén son cousa dos 'peques'

• Ourense
• Estudantes

Son os que mellor o pasan cada día no campus de Ourense e polo tanto non é de estrañar que tamén sexan os que máis peniña teñen de que remate este curso académico. Os 43 nenos e nenas da Escola Infantil do campus celebraron este venres a súa festa fin de curso como mellor saben, poñendo en escena todas as habilidades adquiridas ao longo destes meses de aprendizaxe na aula. Como non podía ser menos, o alumnado de último curso tamén celebrou o seu propio acto de graduación, aínda que nesta ocasión a habitual cea posterior foi substituída por unha divertida sesión de xogo nos colchóns inchables.

20/06/2014

263 novos profesionais para facer unha sociedade mellor

• Ourense
• Estudantes

A educación e os servizos sociais son dous dos piares do estado de benestar que máis se viron afectados polos recortes económicos realizados polos gobernos para facer fronte á crise. Esta decisión levanta non poucas discrepancias por considerarse que é precisamente nesta situación crítica cando máis preciso é axudar á sociedade e cando a formación se volve unha ferramenta fundamental para cambiar as cousas. Con estas reivindicacións nos discursos e no sentimento, este sábado 263 egresados da Facultade de Ciencias da Educación do campus de Ourense celebraron o seu acto de graduación.

16/06/2014

De Brasil a Ourense para formarse como xestor empresarial do deporte

• Ourense
• Estudantes

Falar de Brasil na actualidade é falar de deporte, principalmente de grandes competicións deportivas. O Mundial de Fútbol FIFA 2014 que agora se está a disputar e as Olimpíadas 2016 están a revolucionar o propio país e a imaxe que del se ten no exterior. Con defensores e detractores, con luces e sombras nun país en desenvolvemento, estes macroeventos moven grandes cantidades de persoas pero fundamentalmente de diñeiro. Neste contexto en auxe, o brasileiro Thadeu Gasparetto decidiu este curso realizar o Máster en Xestión Empresarial do Deporte que se imparte no campus de Ourense debido ao seu prestixio internacional.

16/06/2014

Co título de científicos na man pero celebrándoo co corazón

• Ourense
• Estudantes

No deseño do futuro dun país, a ciencia é, ou debería ser, a súa armazón fundamental. Nas mans dos científicos está comprender o descoñecido, avanzar no entendemento do que nos rodea e aproveitar ese coñecemento para facer unha sociedade cada vez máis desenvolvida. Diso saben moito os 68 novos titulados e tituladas de grao e posgrao da Facultade de Ciencias do campus de Ourense que este venres celebraron o seu acto de fin de estudos. Co diploma que os acredita como científicos na man pero sobre todo co corazón enchido de orgullo e ilusión, os novos egresados pechan unha nova etapa da súa vida e abren outra na que lles agardan moitos retos que enfrontar.

13/06/2014

39 egresados en Dereito, 15 en Historia e o desexo común dun futuro prometedor para todos

• Ourense
• Estudantes

Este venres continuaron os actos de graduación no campus de Ourense e nesta ocasión foi a quenda de 39 egresados do grao de Dereito e 15 do grao de Xeografía e Historia. Con perfís e formacións moi diferentes, todos eles e elas compartiron a satisfacción de rematar os seus estudos, a inquedanza por abrir unha nova etapa e o desexo dun futuro no que poder atopar un oco no que desenvolver todo o seu potencial profesional e persoal. Son, destacaron os responsables académicos, o maior orgullo deste campus, un campus que sempre terá abertas as súas portas para aqueles que desexen continuar formándose.

06/06/2014

O reto de emprender unha nova etapa para 118 titulados en Ciencias Empresariais e Turismo

• Ourense
• Estudantes

É tempo de graduacións na Universidade e este venres 118 novos titulados da Facultade de Ciencias Empresariais e Turismo do campus de Ourense celebraron no Auditorio Municipal o fin do seus estudos. As novas promocións dos graos de ADE, Turismo e Consultaría e Xestión da Información emprenden unha nova etapa persoal e profesional nun momento no que lles tocará pór en práctica o que tantas veces escoitaron nas aulas, que as crises non só teñen unha parte negativa senón que tamén supoñen unha oportunidade para aqueles que saben velo así.

30/05/2014

A primeira promoción do Grao de Enfermaría soña xa coa bata branca

• Ourense
• Estudantes

O curso académico 2013/2014 comeza a súa recta final e como cada ano por estas datas comezan os actos de graduación dos seus alumnos e alumnas de último curso. Os máis madrugadores este curso no campus de Ourense foron este venres os estudantes da Escola Universitaria de Enfermaría. A primeira promoción do Grado de Enfermaría, formada por 41 persoas, celebrou con emoción e acompañada de amigos, familiares e membros da comunidade universitaria o peche da vida académica e o inicio doutra etapa persoal e profesional. Na mente de todos estaba que a banda que hoxe conseguiron se transforme pronto nunha bata branca de persoal de enfermaría.

16/05/2014

24 horas ao día conectados a un mundo virtual

• Ourense
• Estudantes

Un dos comportamentos máis característicos da sociedade actual é vivir permanente 'conectados' a través das novas tecnoloxías. Xa sexa a través do teléfono móbil, do ordenador ou da tableta, o perfil do cidadán continuamente comunicado cos demais a través de Internet estase volvendo o imperante. Como un xogo no que levar ao máximo expoñente ese 'estar sempre conectados' e co obxectivo de compartir diversión e convivencia con persoas con intereses afíns, destes este xoves e durante toda a fin de semana o Pavillón de Deportes do campus acolle a celebración da Technium Lan Party 2014. A cita conta este ano con máis de 317 inscritos.

11/04/2014

Graduados pero de novo estudantes do Programa para Maiores

• Ourense
• Estudantes

O campus de Ourense acolleu este xoves o primeiro acto de graduación que se celebra este curso académico. Non entanto, era unha graduación demorada do curso pasado. 22 alumnos e alumnas do Programa para Maiores das Aulas de Formación Aberta tiñan pendente celebrar o remate da primeira etapa no curso 2012/2013 do Ciclo Intensivo, e non quixeron deixar pasar a oportunidade de compartir con amigos, familiares, compañeiros de estudos e docentes un logro tan sinalado nas súas traxectorias. Este curso, eles e elas continúan estudando no campus de Ourense facendo a segunda etapa do programa, o Ciclo Especializado.

11/04/2014

Quen dixo aburridos?

• Ourense
• Estudantes

Para divertirse xuntos a diferenza de idade non é un obstáculo, é un aliciente que enriquece aínda máis a experiencia. Con esta idea en mente, este xoves déronse cita en Ourense nas XI Xornadas Interxeracionais case 200 persoas pertencentes a tres colectivos moi diferentes, como son a terceira idade, os universitarios e os escolares. Xuntos compartiron xogos tradicionais e outros máis actuais e asistiron a diferentes actividade de ocio, como actuacións e unha merenda, que lles permitiron falar de ti a ti e compartir diversión a xeracións que habitualmente non se relacionan salvo no contexto familiar.

10/04/2014

O equipo de debate do campus comeza a competir fóra da casa

• Ourense
• Estudantes

Nos últimos anos, Pablo Raúl Bonorino, profesor da Facultade de Dereito, marcouse como obxectivo implantar a cultura do debate no campus de Ourense. Despois de levar a cabo varios obradoiros de extensión universitaria e de realizar a finais de 2013 unha experiencia piloto de liga de debate, este ano o seu empeño comeza a dar froitos e o primeiro equipo de debate universitario do campus xa está en marcha, formado por catro alumnos e alumnas que xa teñen dentro o gusaniño de gañar cos mellores argumentos. Para adquirir experiencia na competición, o conxunto comeza agora a participar nos seus primeiros torneos fóra da casa.

04/04/2014

Un brinde con viño e sidra polo futuro do sector enolóxico

• Ourense
• Estudantes

O alumnado do Máster en Dirección e Planificación do Turismo Interior e de Saúde da Universidade de Vigo celebra este venres o acto de posgraduación da súa terceira promoción. Os seus estudantes enfilan agora o último tramo dos seus estudos quedándolle só pendentes as prácticas e a presentación do traballo fin de máster. Para completar a súa formación, no último mes dedicaron unha especial atención a un sector de gran potencial na provincia como é o enolóxico, concretamente á produción de viños e, como novidade, á de sidra. Segundo destacan os expertos, Galicia ten no sector enolóxico unha das súas principais vía de desenvolvemento futuro.

28/03/2014