Vitrasa porá en funcionamento as lanzadeiras ao campus durante os exames de setembro

Co inicio dos exames de setembro o vindeiro martes día 1, Vitrasa reforzará o seu servizo e volverá a poñer en funcionamento a liña de lanzadeiras ao campus dende a praza de España e a praza de América.
A liña U1, entre os días 1 e 18 de setembro, terá saídas dende a praza de América ás 8.20 h e 8.40 h e, dende as 9.40 h, aos 40 minutos de cada hora ata as 20.40 horas. Dende o campus, as saídas cara a cidade serán ás 8.45 e 9.05 e, dende as 10.05 horas, aos 5 minutos de cada hora ata as 21.05 h.
A lanzadeira U2, pola súa banda, sairá da praza de España ás 8.20 h e 8.40 horas e, dende as 9.10 h ata as 20.10 horas, aos 10 minutos de cada hora. Dende o campus, esta liña sairá ás 8.45 h e 9.05 horas e, dende as 9.40 h e ata as 20.40, aos 40 minutos de cada hora.
Paralelamente, as liñas L8, con saída do Areal, e a C15C, dende Samil, manteranse entre o día 1 e o 18 co servizo habitual que prestan durante o curso académico. Xa a partir do día 21, co comezo do período lectivo, as lanzadeiras volverán retomar o seu horario habitual do curso.