Os profesores aprenden a preparar os materiais docentes integramente con software libre

Os profesores do campus poderán preparar as súas clases integramente con programas de software libre grazas ao curso Elaboración de materias docentes empregando ferramentas informáticas gratuítas que está sendo impartido por Xosé Antón Vila Sobrino. Dende o pasado 6 de febreiro e ata a semana que vén, a ofimática libre é a protagonista deste curso pertencente ás accións formativas institucionais que a Área de Innovación Educativa da Vicerreitoría de Formación e Innovación Educativa desenvolve ao longo de todo o ano.
Vila Sobrino, profesor do Departamento de Informática, explicou que o obxectivo principal da actividade “é dotar aos profesores do coñecemento necesario para preparar todo o material docente que empregan habitualmente con ferramentas gratuítas e así substituír os tradicionais programas de tratamento de texto e imaxe como son o Office ou o Photoshop, por exemplo, por software libre”.
O curso, que ten as súas 20 prazas cubertas, está aberto a todos os profesores da Universidade de Vigo, polo que a súa procedencia é moi variada. Pese a que hai unha representación de case a totalidade das titulacións do campus, “os da Escola Superior de Enxeñaría Informática coñecen mellor o que se lles explica que os demais, que quedan moi sorprendidos cando descobren todas as posibilidades destas ferramentas que non coñecían” puntualizou Vila.
En canto á experiencia, o profesor cualifícaa de “moi positiva e esta é a terceira edición do curso, despois doutras dúas que xa se fixeron en Vigo. Nas enquisas a única pega que atopamos é a escasa duración, pois nas 20 horas que dura só da tempo a dar unhas pinceladas básicas da aplicación de cada cousa: elaboración de documentos, gráficos, presentacións ou edición de vídeo, audio e imaxe”. Vila engadiu que “o importante é que saiban que existen outros instrumentos gratuítos”. En vista do éxito, o curso ten previstas dúas edicións máis nos campus de Vigo e Pontevedra.

Guía dos contidos do curso