Futuros xuristas coñecen de primeira man o traballo dos médicos forenses

Cada curso académico a Facultade de Dereito do campus de Ourense organiza unha conferencia de Fernando Serrulla Rech, responsable da Unidade de Antropoloxía Forense do Instituto de Medicina Legal de Galicia (Imelga), que permite ás e aos futuros xuristas familiarizarse co traballo que realizan os médicos e médicas forenses. Este ano, como novidade, a xornada trasladouse ao Instituto de Medicina Legal de Galicia, con sede no hospital de Verín, para que o alumnado tivera a oportunidade de coñecer in situ o traballo que es realiza neste órgano. Tamén asistiron á conferencia A antropoloxía forense ao servizo da xustiza. Na actividade participou unha trintena de estudantes do Grao en Dereito, o Máster Universitario da Avogacía e o Programa Conxunto ADE-Dereito. As e os asistentes contaron coas explicacións de Fernando Serrulla, médico forense cunha dilatada traxectoria na que destacan casos como a autopsia de Diana Quer tralo achado do seu cadáver, a segunda autopsia que identificou os restos dos fillos de José Bretón tras unha primeira autopsia errónea, a identificación de corpos do 11-M ou a exhumación de soldados descoñecidos mortos na guerra das Malvinas. A actividade estivo dirixida por Marta Fernández, decana da Facultade de Dereito, e Benjamín Mayo, coordinador profesional do Máster Universitario en Avogacía do campus de Ourense.