Arteterapia para crear un espazo de benestar colectivo no último obradoiro do curso

O ritmo de vida actual require facer unha pausa e buscar un espazo para a relaxación, coñecerse a un mesmo e achegarse con harmonía aos demais. Con esta premisa, o obradoiro de arteterapia pecha as actividades extracurriculares da Área de Extensión Cultural e Estudantes do campus para o segundo cuadrimestre, logo de tres meses de actividades diversas en torno ás linguaxes escénica, musical, artística, audiovisual e de comunicación.
A profesora do curso, Charlotte Mouly, define a arteterapia como “un medio para o desenvolvemento persoal, que se basea na creación artística como vía de expresión do mundo interno”. Para isto, explica que non é preciso ter coñecementos previos en arte ou danza, que son as principais linguaxes expresivas que emprega nas clases. “O curso é práctico e vivencial”, comenta nese sentido, ao que engade que nas sesións se xera un proceso creativo individual ou en grupo, “no que cadaquén pode liberar e expresar o artista interior que todos temos dentro”.

Espazo de desenvolvemento da intelixencia emocional

Segundo Mouly, a arteterapia é tamén un espazo de investigación para desenvolver a intelixencia emocional, favorecer o coñecemento dos recursos persoais e aumentar a confianza e estima propias. Ademais, engade que “busca estimular a creatividade desde o soporte das técnicas artísticas, favorecer a comunicación intra e interpersonal, axudar a superar bloqueos persoais e crear un espazo de benestar individual e colectivo”.
Para conseguir eses obxectivos emprega na clase diferentes técnicas de estimulación artística a través da danza, a música, a pintura, a olaría, a fotografía, a escritura creativa e a colaxe. En cada sesión, de tres horas de duración, combina tamén dinámicas de movemento e conciencia corporal con outras de relaxación mental, confianza, escoita e xogo, para integrar a experiencia na expresión artística.

Curar coa arte

Están apuntados neste taller 13 participantes, estudantes ou xa titulados en Belas Artes, Comunicación Audiovisual, Fisioterapia ou Educación. Nunha chuvia de ideas realizada como dinámica cos alumnos e alumnas dentro do propio taller, definen a arteterapia cos seguintes conceptos: “cor, creación, espontaneidade, imaxinación, equilibrio, emocións, baile, diversión, axuda, contacto, ilusión, crecemento, compartir, xogar, afondar e experimentar”. Pensan tamén que é un xeito de “curar coa arte” e, en resposta á pregunta de para que serve destacan que “axuda a coñecerse a un mesmo, ao tempo que permite romper barreiras para achegarse aos demais e crear un espazo común de traballo”. Así mesmo, valoran os seus efectos relaxantes e liberadores e a súa contribución ao desenvolvemento da imaxinación e da creatividade.