Comeza a tempada de baloncesto con novos adestradores

Con novas incorporacións e baixo as ordes de dous novos adestradores, os clubs feminino e masculino de baloncesto do campus de Ourense regresan á competición con propósitos distintos: ascender de categoría no primeiro caso e mantela no segundo. “O ano pasado o equipo finalizou a tempada dentro do grupo que loitaba por non descender, e lográrono. Agora o obxectivo máis próximo é o de conseguir canto antes os puntos para asegurar a permanencia na I División Nacional”, afirmou o adestrador dos rapaces, Xulio González, responsable durante os últimos sete anos das categorías base do Club de Baloncesto de Ourense, COB.
Polo momento, os once universitarios xa contan cunha vitoria, a lograda esta fin de semana contra os Estudantes de Lugo. “Era o primeiro partido, aínda con moitas imprecisións, pero estivemos case todo o encontro por riba e ao final rematamos 71-53”.

A pretempada das rapazas
En canto ao equipo feminino, o inicio da competición non terá lugar ata finais de outubro, aínda que as doce xogadoras xa levan adestrando varias semanas baixo a dirección de Roberto Pérez, o novo adestrador para esta tempada.
A súa relación con este deporte comprende as dúas beiras, como xogador durante a adolescencia e como adestrador nos últimos anos. Agora, tras exercer como colaborador da Federación Ourensá de Baloncesto, chega ao equipo feminino cun obxectivo moi claro, conseguir de novo o ascenso á categoría autonómica porque esta é, segundo as súas verbas, a competición máis axeitada á calidade das xogadoras. “Polo que me din elas é factible chegar á fase de ascenso, pero a partir de aí... aínda é moi cedo para sabelo, mais tentarémolo”.
O ano pasado remataron descendendo á liga provincial, pero a ausencia en Ourense de máis equipos da súa categoría, obrígaas a competir este ano contra equipos sénior de Pontevedra. Para isto están a desenvolver a pretempada, adestrando tres días á semana durante dúas horas no Pavillón de deportes do campus. En total forman un plantel de doce no que a máis nova ten 19 anos, e a máis veterana, 27. “Seis delas son novas incorporacións, todas xogadoras que entraron na Universidade”, apuntou Roberto.