Unha exposición reúne fotografías realizadas polo alumnado de Belas Artes ao longo de 30 anos

Organizada polo Concello de Pontevedra, coa colaboración da Facultade de Belas Artes, a exposición Fotosensíbeis achegará ao Pazo da Cultura de Pontevedra un conxunto de fotografías realizadas ao longo de preto de tres décadas por alumnos e alumnas de Belas Artes. A exposición ten como comisario ao fototohistoriador Manuel Sendón, profesor da facultade ata a súa xubilación, e reúne un conxunto de traballos realizados por 31 artistas de diferentes xeracións durante a súa etapa de formación neste centro. 

Presentada este martes no Concello por Sendón e o concelleiro de Cultura, Demetrio Gómez, Fotosensíbeis celebrará a súa inauguración este venres 25 de abril ás 18.00 horas e poderá visitarse ata o 18 de maio. Dirixida a amosar as posibilidades da fotografía como medio de produción artística, reúne unha “escolma de traballos que se iniciaron e remataron na clase”, xunto cunha selección de traballos de fin de grao dirixidos por Sendón e outros realizados no Grupo de Investigacións Fotográficas da Universidade de Vigo, do que foi investigador principal.

Baixo a coordinación de Vaciocero, esta exposición permitirá coñecer unha serie de fotografías realizadas por 23 antigas alumnas e oito egresados, entre os que se atopan nomes como Maruxa Fernández, Elena Fernández Prada, Salvador Cidrás, Fran Herbello, Belén Gómez, Olalla García San León ou Victoria Diehl. Nese senso, o concelleiro de Cultura destacou esta exposición como unha oportunidade única para coñecer os primeiros traballos de artistas que rematarían sendo internacionalmente recoñecidas, como Diehl ou Herbello.

A exposición verase complementada por unha serie de actividades coordinadas por Vaciocero, como visitas guiadas á mostra ou dous obradoiros que teñen como punto de partida as fotografías reunidas nesta mostra.