Localizadores e un percorrido máis sinxelo, novidades da segunda edición da proba "10 Km Cidade Universitaria"

Vigo
Co obxectivo de achegar o deporte aos estudantes e facer propostas que incorporen o exercicio como un hábito de vida saudable, celébrase este vindeiro domingo, 30 de marzo, a segunda edición da proba 10 Km Cidade Universitaria, unha iniciativa do Servizo de Deportes da Universidade de Vigo en colaboración coa Delegación da Federación Galega de Atletismo e o Comesaña Sporting Club de Vigo, e que xa conta con máis de 350 inscritos, aínda que as expectativas dos organizadores é acadar os 500.
A proba que se disputará esta fin de semana no campus de Lagoas Marcosende está moi mellorada en relación ao ano anterior e entre as novidades hai que destacar que o circuíto é máis sinxelo polo que poden participar todos aqueles que estean interesados. Ademais, os corredores levarán un dispositivo colocado nas zapatillas que lles permitirá estar localizados en todo momento, conseguindo deste xeito unha competición máis segura.

O circuíto

Toda a proba realizarase na zona alta do campus, contando cunha cota máxima de 475 metros e unha mínima de 455 metros, o que a converte nunha proposta moito máis plana que a da edición pasada. A carreira comezará cunha cola de saída de 123 metros e continuará cunha volta a circuíto de 661 metros e dúas voltas de 4563 m. “En xeral, o percorrido é máis sinxelo que o do ano anterior, polo que acadamos o noso compromiso de mellorar e o seguiremos facendo cada ano”, comentou o responsable do Servizo de Deportes, Javier Rial. O terreo xa foi probado polo atleta Elías Domínguez, un dos corredores cos que se contará ademais de outros nomes coñecidos como Marta Fernández.

Máis actividades

Ademais da carreira en si mesma, a organización ten preparadas outras actividades para facer do evento “un día de festa e de diversión”, tal como explicou a vicerreitora, María del Carmen Cabeza, animando a toda a cidadanía a participar. Unha unidade de fisioterapia, actuacións de animación durante a proba para poder retransmitila dun xeito diferente e varios entretementos para nenos co obxectivo de poder acudir en familia, son algunhas das propostas coas que se atoparán os asistentes. O servizo de comedores e cafetería do campus abrirá durante toda a xornada.