Os montes de Santa María de Oia acollerán esta fin de semana o curso de parapente

Os montes da localidade de Santa María de Oia son os elixidos para o despegue inicial dos matriculados no curso de parapente previsto para esta fin de semana. O Servizo de Deportes, en colaboración co Club Nortada, ofrece aos membros da comunidade universitaria a posibilidade de realizar un salto na modalidade tándem, é dicir, “en compañía dun piloto profesional”, tal como apunta o instrutor Francisco López, que engade que “a maioría dos inscritos son alumnos, pois dende que comezou esta actividade, hai aproximadamente dez anos, vense producindo un descenso progresivo do número de profesores interesados”.
O material necesario para o voo será proporcionado polo propio club, de modo que “os alumnos só teñen que levar roupa cómoda e calzado de montaña”, segundo palabras de López. A actividade é eminentemente práctica e as escasas nocións teóricas precisas serán impartidas no momento da preparación do despegue.
As condicións meteorolóxicas son un dos elementos determinantes á hora de realizar os saltos, polo que a duración do curso é variable, sobre todo tendo en conta que “o proceso de preparación do voo de cada alumno dura máis dunha hora”, tal como apunta o instrutor.

Delecer 2008

Ademais de parapente, o programa de deporte para o tempo libre, Delecer, prevé cursos de paracaidismo e pontismo dirixidos aos membros da comunidade universitaria, así como aos seus acompañantes e aos socios do Complexo Deportivo Universitario de Vigo.
O curso de pontismo terá lugar no viaducto sobre o Tambre no concello de Noia mentres que o aeródromo de Palmeira é o elixido para o obradoiro de paracaidismo.