Presentación conxunta dos novos programas “Ponte en forma” do Servizo de Deportes, e “A Intercultural” de Actividades Culturais

A vicerreitoría do campus vén de presentar os novos programas de Actividades Culturais e do Servizo de Deportes. O primeiro deles, denominado A Intercultural comprende iniciativas musicais, audiovisuais, divulgativas e outras determinadas polos espazos onde se realizan. Pola súa banda, o proxecto Ponte en forma pretende achegar o exercicio físico controlado por profesionais á comunidade universitaria para a mellora da súa saúde.
Juan Francisco Gálvez, vicerreitor, destacou que “ambos programas son froito dun enorme esforzo pola nosa banda, tanto a nivel de traballo como económico, polo que confiamos no seu éxito. Coa Intercultural queremos abrirnos á cidadanía polo que non todas as accións se desenvolven no campus”. En canto ao proxecto Ponte en forma que si é exclusivo para a comunidade universitaria, Gálvez recordou que “en Vigo xa leva dous anos funcionando e por fin puidemos traelo para aquí”.

A Intercultural

De xeito experimental e con motivo do Ano Europeo do Diálogo Intercultural, a programación de cultura pretende dar unha visión global do que se está a facer fóra das aulas nos distintos ámbitos. A encargada de xestionar A Intercultural é a empresa Abana Eventos, da que Xavier Paz foi o elixido para presentar as iniciativas coas que conta. “Por medio dos catro bloques temáticos tentamos facer unha proposta variada con representación dos diferentes xéneros artísticos” explicou . Así, mediante actividades musicais, divulgativas, proxeccións audiovisuais e outras determinadas polos escenarios o campus quere “converterse nun referente cultural da Universidade de Vigo e da cidade de Ourense” comentou.
Para dar a coñecer estas actividades “que abranguen todas as semanas lectivas ata maio” distribuirase un calendario dos catro meses e unha revista “en formato gaceta para informar mensualmente das próximas propostas” dixo Xavier paz. Precisamente no mes de febreiro chegan as dúas primeiras: Telémaco e Fóra do sagrado.
O día 22 a Praza do Correxidor acollerá a proposta de novas músicas do grupo Telémaco que trala xira dos eu primeiro albume Outótono por América, chega para presentar o segundo, Terra cunha sesión sonora e visual concibida como unha viaxe telúrica.
Fóra do sagrado é o título do libro de Anxo Angueira que cun recital poético “que adquire a categoría de performance presentará nun espazo non convencional para estes actos: o pequeno anfiteatro que forman as escaleiras da entrada do campus” comentou Paz. A cita será o 27 de febreiro.

Ponte en forma

O outro programa que se presentou foi o chamado Ponte en forma no que o médico especialista en medicina deportiva, Juan José Crespo analizará de xeito exhaustivo a saúde e o estado de forma dos usuarios. Posteriormente e baseándose nese informe, Guillermo Santos, licenciado en Educación Física, encargarase de deseñar as rutinas deportivas máis axeitadas para cada persoa.
O doutor Crespo explicou que “estamos nun momento de auxe do tempo de ocio sedentario, o que causa enfermidades cardiovasculares, obesidade ou osteoporose, entre ouros problemas. É importante por tanto que se faga unha promoción da saúde e do deporte con supervisión con programas de exercicio físico personalizado como é este caso. Así minimízanse os riscos pois non todos os exercicios son para todo o mundo” dixo.