A relación entre a muller e a arte artella a exposición “Rosas y corazones”

O bionomio arte e muller e as cuestións relacionadas co xénero guían boa parte do traballo do grupo de investigación ES2 da Facultade de Belas Artes, codirixido por Yolanda Herranz e Jesús Pastor. A investigación neste campo debe confluír na creación e por iso o grupo vén de inaugurar a exposición Rosas y corazones na Galería Sargadelos da cidade. Ata o 6 de xuño o público que alí se achegue poderá coñecer o traballo da propia Yolanda Herranz pero tamén de Celeste Garrido, Sonia Tourón, María Covadonga Barreiro, Nuria Ruibal, Noemí Lorenzo, Laura Piñeiro e Basilisa Fiestras.
“É importante sinalar”, comenta Herranz, “que todas elas son artistas universitarias, que teñen formación académica e os seus traballos sempre teñen unha base conceptual”. Así, as pezas presentadas acotan a relación da experiencia creativa e a condición feminina e, desde ese lugar, profundizan na relación entre a muller e a arte, desde visións estéticas, críticas, políticas e de mercado, dentro do panorama internacional, español e galego.
Nestas artistas, que gozan de diferentes bolsas para desenvolver a súa actividade, a investigación e a creación están indisolublemente vinculadas e nas obras seleccionadas para a exposición reflíctense dúas das principias liñas de investigación do grupo: a experiencia creativa e a condición feminina e a atención ao corpo como un problema, un lugar, un material e unha experiencia do proxecto artístico.

Peche de “Sin rencor” e preparación da publicación

Son días de moita actividade para os membros do grupo ES2 e é que, á inauguración de Rosas y corazones, únese a preparación dunha publicación que, baixo o mesmo título, recolla esta selección. O catálogo contará cunha introducción de Yolanda Herranz e dedicará un capítulo a cada artista, facendo referencia a Alicia en el país de las maravillas, unha temática que encaixa á perfección no espírito da mostra. A maiores, as artistas botan o peche a Sin rencor a exposición na Galería Metro de Vigo, na que cinco delas (Herranz, Barreiro, Piñeiro, Ruibal e Fiestras) presentaron as súas obras, e xa preparan outra na Fundación Gonzalo Torrente Ballester, fieis á súa filosofía “de presentar proxectos en diferentes lugares”.