Diario da Universidade de Vigo
Co gallo do Día do Libro LGBTIA+ nun acto celebrado en Redeiras
A UVigo pon en valor a importancia da visibilidade do colectivo LGBTIA+ a través da literatura
En dúas mesas redondas con estudantado e asociacións
Promovido pola Unidade de Diversidade e a investigadora predoutoral Carla Míguez Bóveda, a UVigo sumouse por vez primeira á celebración do Día do Libro LGBTIA+ con dúas mesas redondas desenvolvidas no edificio Redeiras, nas que se puxo en valor a importancia da representación e da visibilidade do colectivo LGBTIA+ a través da literatura.
Na primeira actividade, a docente e escritora Lara Boubeta e tres das súas alumnas de sexto de Primaria do CEIP Plurilingüe de San Roque de Darbo (Carol, Cande e Ale) falaron dos seus libros favoritos e da importancia da inclusión de personaxes LGBTIA+ na literatura infantil para normalizar o colectivo. Na segunda mesa redonda, representantes das asociacións Nós Mesmas, Avante LGBT+ e Rede Educativa de Apoio LGBTIQ+ subliñaron a necesidade de que haxa máis docentes coma Lara Boubeta, que eduquen ao estudantado na diversidade e reflexionaron sobre a necesidade de inclusión real na literatura: a importancia de que haxa historias felices, de que se representen todas as letras que forman a sigla LGBTIA+ ou de que este tipo de libros teña presenza en bibliotecas escolares e municipais, algo que non ocorría hai anos.
O acto rematou cunha entrega de libros de temática LGBTIA+, doados pola editoriais Xerais, Continta me tienes, Egales. LES, Bellaterra e Rinoceronte, ás asociacións Nós Mesmas e Avante LGBT+.