Robots creados polos alumnos desfilan polos corredores da ETS de Enxeñeiros Industriais

Co obxectivo de aprender xogando, os profesores da ETS de Enxeñeiros Industriais Rafael Sanz e Enrique Paz organizan, dentro da materia que imparten, o concurso Robots Móbiles. A experiencia, que botou a andar no 2000, conta cunha gran aceptación entre os estudantes, posto que, tal como comenta Antonio Díez, un dos alumnos, “tendo en conta que se trata dun traballo voluntario, é destacable que preto do 90% da clase estea integrado nalgún dos dez grupos participantes”.
“Contando cun prazo de tres meses, os estudantes teñen que traballar con algoritmos e sensores de distancia e cor para montar e programar un robot capaz de superar unha serie de probas, entre as que se atopa a de buscar a saída dentro dun labirinto, seguir unha liña curva, coller obxectos situados dentro dun círculo e levalos para fóra e, por último, a máis interesante, o sumo entre robots”, segundo apunta o profesor Enrique Paz. O grupo que quede mellor situado na clasificación xeral recibirá como premio un punto máis sobre a nota do exame final da materia Control e Programación de Robots e Sistemas de Percepción.
Os organizadores móstranse moi satisfeitos co nivel acadado nesta edición, xa que “cinco dos robots presentados son sobresaíntes e isto é o que nos anima a repetir a experiencia ano tras ano”, segundo palabras de Paz, quen ademais considera que “un dos obxectivos da materia, que é resultar entretida ao alumnado, cúmprese amplamente deste xeito por tratarse un traballo moi competitivo no que a parte lúdica está moi presente”