Novas do DUVI

Os profesores do campus adaptarán as súas materias ao novo Sistema Europeo de Transferencia e Acumulación de Créditos

• Pontevedra
• Académica

Coa adaptación ao novo sistema marcado polo Espazo Europeo de Educación Superior, os alumnos non son os únicos que teñen que adaptarse ás novas ensinanzas que se van implantar, senón que os propios docentes tamén necesitan formarse ante este novo reto. Para isto, desde a Vicerreitoría de Formación e Innovación Educativa organízanse constantemente cursos para o profesorado, como é o caso do que se impartirá en Pontevedra, baixo título Elaboración de guías docentes.

12/03/2008

Un monográfico sobre Alexander Kluge abriu a programación de primavera do campus

• Pontevedra
• Académica

Cun aforo case completo, a Casa das Campás abriu a súa programación de primavera co ciclo de cine A ollada moderna, un monográfico sobre o realizador alemán Alexander Kluge. A presentación do evento veu da man do vicerreitor do campus de Pontevedra, Jesús Hernández, quen amosou a súa satisfacción por este tipo de iniciativas que “van dirixidas a un público específico, a unha minoría”. Baixo a dirección do profesional Suso Novás, os asistentes puideron escoitar unha clase maxistral sobre a industria cinematográfica na Alemaña da segunda metade do século XX, antes de ver o primeiro dos nove filmes que se proxectarán ao longo de todo o programa.

12/03/2008

A Fundación Idissa formará socorristas na Facultade de Ciencias do Mar

• Vigo
• Académica

A Fundación Idissa, en colaboración coa Universidade de Vigo entre outras institucións, organiza un curso de socorrismo en instalacións acuáticas e espazos naturais. Esta actividade que bota a andar o vindeiro venres 14 de marzo, celebrarase na Facultade de Ciencias do Mar durante as fins de semana ata completar as 520 horas que compoñen o curso. Esta iniciativa forma parte dun programa de formación máis amplo que esta a levar cursos desta índole por diversos concellos da xeografía galega.

11/03/2008

O Centro de Linguas abre a convocatoria para realizar o exame do DELE

• Vigo
• Académica

Todos aqueles que queiran acreditar os seus coñecementos de español como segundo idioma teñen a oportunidade de realizar o exame de obtención do Diploma de Español como Lingua Estranxeira na Universidade de Vigo. As probas terán lugar o vindeiro 23 de maio e o prazo de matrícula estará aberto ata o 18 de abril. Para poder acoller estas probas, en 2005 a Universidade asinou co Instituto Cervantes, organismo que expide estes títulos en nome do Ministerio de Educación e Ciencia, un convenio de colaboración que acreditaba á institución viguesa como centro de exame. Isto permite que os estranxeiros de estudan español como lingua estranxeira poidan facer as probas para o DELE na Facultade de Filoloxía e Tradución, obtendo así un documento oficial con recoñecemento nos países con que España ten asinado acordos bilaterais en materias de educación.

11/03/2008

Gradúase a primeira promoción de titulados en Información Técnica do Medicamento

• Ourense
• Académica

A primeira promoción do Graduado Superior en Información Técnica do Medicamento xa está na rúa despois de completar a formación que os acredita como profesionais no sector. A principal saída deste título propio é a de visitador médico e, polo tanto, está dirixido a todos aqueles que pretendan dedicarse a iso ou que xa o fagan e queiran actualizar os seus coñecementos. Os dous cursos dos que constaba o graduado superior impartíronse de xeito on line grazas á plataforma de teledocencia da Universidade de Vigo.

07/03/2008

“Eliminar o sistema de cualificacións é a clave da avaliación para a aprendizaxe”

• Vigo
• Académica

Substituír o actual sistema de cualificacións, empregado pola ampla maioría dos docentes, por un procedemento baseado en comentarios escritos a exames e traballos é a proposta que Charly Ryan, profesor da Universidade de Winchester e investigador no ámbito das Ciencias aplicadas á educación, fai para lograr unha avaliación enfocada á aprendizaxe. Durante a exposicíon, inserta no I Ciclo de Conferencias de Innovación Educativa, ofreceu ademais consellos para impartir docencia.

07/03/2008

Cine, moda e artes escénicas enchen a axenda da Casa das Campás para esta primavera

• Pontevedra
• Académica

 Nas vindeiras semanas, Xoves de Moda e Interzonas serán dous dos termos que máis se escoitarán no campus e fóra de el, xa que a Casa das Campás abre a súa programación para esta primavera a toda a cidadanía. Ciclos de cine, encontros con profesionais do eido do deseño e todo tipo de artes escénicas son algunhas das iniciativas que se desenvolverán ata o vindeiro mes de maio e, en verbas de Jesús Hernández, “teñen moita calidade e creo que por fin imos a acadar o que queriamos para a Casa das Campás”.

07/03/2008

Unhas xornadas formativas permitirán aos traballadores actualizar coñecementos

• Ourense
• Académica

Nun momento no que se están a dar constantes cambios na estrutura productiva cómpre proporcionarlle aos traballadores e ás empresas a formación permanente necesaria para adaptarse ao novo marco económico, actualizar os seus coñecementos e mellorar a súa situación. Con este obxectivo nacen as Xornadas sobre Formación Continua organizadas polo Consello Galego de Relacións Laborais e coa colaboración do grupo La Región e as Facultades de Empresariais e Turismo e Dereito.

06/03/2008

Docentes en forma da man da Área de Innovación Educativa

• Vigo
• Académica

Os docentes da Universidade teñen a partir deste luns unha nova oportunidade para pórse en forma co curso “Actividade física e saúde: ximnasia de mantemento”, unha iniciativa que, da man da Área de Innovación Educativa, pretende, entre outros obxectivos, asesorar aos asistentes sobre cal é o mellor tipo de exercicio que pode practicar para o seu caso particular. Inserido dentro das accións formativas institucionais da Universidade de Vigo para o ano 2008, este curso tentará amosar que todas as persoas poden realizar unha actividade física moderada con beneficios para a súa saúde

06/03/2008

Os dereitos humanos no "Quixote" de Cervantes, protagonistas dunhas xornadas

• Ourense
• Académica

Coa intención de transmitir os valores do personaxe estrela de Cervantes, don Quixote, e de analizar o pensamento do propio escritor sobre os dereitos fundamentais a Facultade de Dereito acolle ao longo do mes de marzo as xornadas O Quixote e os Dereitos Humanos. A través de destacados relatores, dun certame literario e da exposición pictórica de Juan Queralt, que dá nome ás xornadas, abarcaranse diferentes aspectos da obra cervantina e estudaranse as denuncias e reivindicacións que xa no século XVI facía a sociedade.

05/03/2008

Unha formación de calidade con equidade e liberdade, compromiso do Partido Popular para a próxima lexislatura

• Pontevedra
• Académica

“Un bo financiamento, unha avaliación externa e a adaptación a Boloña son as claves para contar cun sistema universitario de referencia”. Con estas verbas rematou Ana Pastor, a cabeza de lista do Partido Popular ao Congreso pola provincia de Pontevedra, o relatorio de clausura das xornadas Política na Educación que se veñen desenvolvendo na Facultade de Ciencias Sociais e da Comunicación con motivo das próximas eleccións do 9 de marzo. A candidata subliñou a intención do PP de acadar unha formación de calidade baseada nos principios de equidade e liberdade, co obxectivo de conseguir un sistema educativo que “prepare aos nosos estudantes para ser competitivos nun entorno cada vez máis global e que sexa a principal garantía de loita contra a pobreza e a exclusión social”.

05/03/2008

“A universidade debe ser un servizo público, cun sistema de bolsas e axudas que permita o acceso a toda a cidadanía”

• Pontevedra
• Académica

Do mesmo xeito que se celebra un debate electoral entre os candidatos á presidencia, a Facultade de Ciencias Sociais e da Comunicación organiza o seu propio cara a cara co ciclo de conferencias Política na Educación, na que os principais partidos da nosa comunidade amosan as súas propostas no eido da formación para a vindeira lexislatura. Tras escoitar na primeira xornada a Domingo Tabuyo, o número tres nas listas do PSOE para o Congreso, o segundo relatorio veu da man de Iria Aboy, a cabeza de lista do BNG ao Senado. Nesta ocasión a candidata nacionalista centrou o seu discurso na aposta do seu partido por acadar “unha universidade que sexa un servizo público”, segundo subliñou a que actualmente é secretaria xeral de Galiza Nova.

04/03/2008

A comarca do Carballiño centra o congreso “O home e o medio: Lembranza histórica”

• Ourense
• Académica

A comarca do Carballiño e do Ribeiro protagoniza o VI Congreso O home e o medio que terá lugar entre os días 14 e 16 de marzo e que na súa sexta edición leva por subtítulo Lembranza histórica. Centrado, nesta ocasión, no eido da historia e con especial relevancia das etapas bélicas, da Idade Media e da Prehistoria, acolle a especialistas de todos os eidos co nexo común do seu ámbito xeográfico de estudo. O Congreso terá lugar na Casa da Cultura de Carballiño e é unha das principais iniciativas do Centro de Estudos Chamoso Lamas, que dende a súa constitución en 1994 leva desenvolvendo unha intensa actividade de investigación e divulgación da comarca.

04/03/2008

Os obradoiros sobre comunicación, primeiros en cubrir prazas

• Pontevedra
• Académica

As persoas interesadas en participar nalgún dos obradoiros do segundo cuadrimestre deben ir tomando xa a decisión, pois este venres remata o prazo para matricularse. Dos nove cursos ofertados, os relacionados co eido da comunicación teñen xa o aforo cuberto, nos demais aínda hai sitio para máis participantes. Cine, música e teatro son as temáticas principais das actividades nas que aínda quedan prazas libres. Entre as principais novidades deste curso: Cinema Documental: aproximación a un territorio por descubrir .

 

04/03/2008

Máis bolsas e mellores contías, principais apostas do PSOE para a próxima lexislatura

• Pontevedra
• Académica

Un incremento das bolsas e das súas contías é a principal proposta do partido socialista en materia de formación para a próxima lexislatura. Así o explicou Domingo Tabuyo no relatorio inaugural das xornadas Política na Educación organizadas polos alumnos da titulación de Xestión e Administración Pública da Facultade de Ciencias Sociais e da Comunicación. O número tres nas listas do PSOE de Pontevedra para o Congreso dirixiuse aos estudantes do campus afirmando que “nesta lexislatura houbo 250.000 bolseiros máis que na anterior”. Tabuyo engadiu que “a mellora na xestión do proceso de bolsas o que vai permitir é que en lugar de que soamente o 30% dos bolseiros podan cobrar a axuda no primeiro trimestre, agora é o 70 % e nos vindeiros anos comprometémonos a que sexa a práctica totalidade dos beneficiarios os que poidan facelo”.

03/03/2008