Diario da Universidade de Vigo
Con xornadas e postos informativos que arrancaron este luns no campus de Ourense
A UVigo únese á celebración esta semana dos #ErasmusDays
O obxectivo é dar a coñecer as oportunidades deste programa de mobilidade internacional
Imaxe da charla celebrada no edificio Xurídico-Empresarial
María Pardal e Juan Cabaleiro, técnicos da ORI
Público asistente
Na sesión explicáronse as convocatorias abertas para o curso 2025/2026
Desde este luns 14 e ata o sábado 19 de outubro celébrase a oitava edición dos #ErasmusDays, una conmemoración internacional impulsada pola Unión Europea para dar a coñecer o seu programa de mobilidade Erasmus+. Sumándose un ano máis a esta iniciativa, a Universidade de Vigo organiza esta semana actividades informativas nos tres campus que arrancaron este luns en Ourense.
Os #ErasmusDays, que nesta edición teñen por lema Facer brillar Europa, convidan a todos os países e institucións participantes no Erasmus+ a organizar eventos dixitais e/ou físicos nos que se dean a coñecer e celebren os proxectos e oportunidades que ofrece este programa de mobilidade. No caso da Universidade de Vigo, os actos están organizados desde a Vicerreitoría de Internacionalización.
Nos tres campus
No arranque da súa programación este luns no edificio Xurídico-Empresarial do campus de Ourense, participaron os técnicos desta vicerreitoría María Pardal e Juan Cabaleiro. “A Universidade de Vigo adheriuse a estes #ErasmusDays e durante esta semana celebraremos diferentes xornadas de difusión do programa, nas que falaramos das diferentes convocatorias abertas. As actividades están destinadas tanto ao alumnado como ao persoal docente e investigador e persoal de administración e servizos”, comentaron.
A programación no campus de Ourense contou cunha xornadas informativa sobre as posibilidades de participación en programas de intercambio para o curso 2025/2026 á que asistiu numeroso alumnado de diferentes titulacións. Seguiulle outra charla sobre as oportunidades concretas da rede europea Athena e rematou coa colocación dun stand no que persoal da ORI atendeu de forma individualizada as consultas do estudantado.
Seguindo o mesmo formato de posto e charlas informativas (que se poden seguir a través do Campus Remoto da UVigo), a actividade dos #ErasmusDays na UVigo continuará mañá martes no campus de Pontevedra, na facultades de Comunicación e de Dirección e Xestión Pública. No campus de Vigo, a programación desenvolverase o mércores 16, na Facultade de Filoloxía e Tradución, e o xoves 17 na Facultade de Bioloxía.