Novas do DUVI

Alumnado de nove nacionalidades conforma a faciana máis internacional do campus

• Ourense
• Estudantes

O alumnado universitario xa está de cheo incorporado ás aulas e formando parte del están, como cada ano, os estudantes que chegan ao abeiro dalgunha das iniciativas de mobilidade internacional. Este primeiro cuadrimestre son 21 os estudantes que elixiron facultades e escolas do campus de Ourense para continuar os seus estudos fóra do seu país de orixe. A eles únense tres que estarán durante todo o curso 2017/2018 e unha persoa que se incorporará no segundo cuadrimestre, cifra esta última provisional xa que a matrícula está aberta ata finais de ano. Trátase en total de 25 persoas de nove nacionalidades entre as que destaca en número o grupo procedente de Italia.

12/09/2017

Auce busca 12 persoas para realizar prácticas en Lisboa e Brescia

• Ourense
• Estudantes

Por terceiro ano consecutivo e nesta ocasión con novidades, a Asociación Universitaria de Ciencias da Educación Auce levará a cabo unha iniciativa de mobilidade que consiste en ofrecer a 12 persoas a posibilidade de realizar prácticas non remuneradas en entidades acordes ao seu perfil en Lisboa (Portugal) e Brescia (Italia). A entidade correrá a cargo dos gastos de aloxamento, viaxes de ida e volta, manutención, transporte local, formación lingüística e seguros de accidentes e responsabilidade civil das persoas beneficiarias. O prazo para inscribirse permanecerá aberto ata o vindeiro mércores 16 de agosto.

03/08/2017

O Gabinete Psicopedagóxico do campus despide o curso superando as 1800 consultas

• Ourense
• Estudantes

Este venres, 14 de xullo, o Gabinete Psicpedagóxico do campus de Ourense pecha a súa actividade ata o 1 de setembro e faino facendo un balance moi positivo dos resultados neste curso académico 2016/2017 que está a piques de rematar. As 1836 consultas atendidas durante este período triplican a cifra do curso pasado e amosan, tal e como destaca a responsable do gabinete, Isabel Ferreiro, “como cada día este servizo é máis coñecidos entre o alumnado, o noso principal usuario, e entre o profesorado, que cada vez nos deriva máis estudantes”.

10/07/2017

Unha alumna de Turismo consegue a bolsa da Hochschule Bremerhaven para a súa escola de verán

• Ourense
• Estudantes

Na súa faciana internacional, a Facultade de Ciencias Empresariais e Turismo do campus de Ourense ten unha especial relación coa Hochschule Bremerhaven, University of Applied Sciences, de Alemaña. Entre as diferentes iniciativas levadas a cabo este curso académico entre as dúas institucións estivo a convocatoria dunha bolsa, sufragada pola universidade alemá, para que un estudante do centro ourensán asista á súa Summer School 2017. A alumna de terceiro curso do Grao en Turismo Cristina Vázquez foi alumna que gañou o proceso de selección, levado a cabo pola facultade do campus.

05/07/2017

Traballo Social pechou os actos de graduación deste curso no campus

• Ourense
• Estudantes

Este venres pecháronse os actos de graduación deste curso 2016/2017 no campus de Ourense. Os encargados de pór o broche a estas conmemoracións foron os estudantes do último curso tanto do Grao en Traballo Social como da Escola Infantil do campus de Ourense. Uns e outros recolleron os distintivos que acreditan o remate dun ciclo e o inicio dunha nova etapa entre o aplauso dos asistentes a cada un dos eventos. Como en toda graduación, non faltou a emoción, o sorriso, a lembranza do tempo compartido, os bos desexos para o futuro e algunha que outra bágoa.

23/06/2017

O alumnado sénior tamén se gradúa no campus

• Ourense
• Estudantes

Entre os actos de graduación que estas semanas se suceden no campus de Ourense este xoves foi o alumnado sénior o que celebrou o remate de ciclo. A XIII promoción de graduadas e graduados universitarios sénior e a II promoción de graduadas e graduados universitarios superior festexaron con membros da comunidade universitaria, familiares e amigos a consecución dun título que simboliza as ansias de seguir medrando como persoas que teñen demostrado cada un deles e delas. Con máis de 55 anos, os homenaxeados e homenaxeadas volveron ás aulas non para orientar a súa vida laboral senón pola paixón de aprender e por ese afán recibiron o aplauso dos presentes na graduación.

23/06/2017

64 novos titulados e tituladas para dar alento á educación social

• Ourense
• Estudantes

Se a pasada semana celebraron o seu acto de graduación as novas promocións de Educación Infantil e Educación Primaria da Facultade de Ciencias da Educación do campus de Ourense, este venres, 16 de xuño, tocoulle a quenda aos novos egresados e egresadas do Grao en Educación Social do mesmo centro. Acompañados por familiares, amigos e membros da comunidade universitaria, os 64 novos titulados e tituladas festexaron o remate da súa vida universitaria e o inicio dunha nova etapa na que están chamados a contribuír a crear unha sociedade mellor a través da educación social.

19/06/2017

De vocación, enxeñeiro ou enxeñeira aeronáutica

• Ourense
• Estudantes

Este venres publícanse as notas das probas de acceso á educación superior, as Abau, e os estudantes que as realizaron están a piques de poder cumprir o seu soño de matricularse na universidade. Para aqueles e aquelas que barallan entre as súas posibilidades estudar o Grao en Enxeñaría Aeroespacial, a Escola de Enxeñaría Aeronáutica e do Espazos da Universidade de Vigo celebrou este venres unha xornada de presentación na que as persoas interesadas puideron coñecer os estudos que imparten, as experiencias de alumnado que está a realizar eses estudos e o campus onde se imparten.

16/06/2017

O menú escolar, a optimización de envases e os metais no solo, temas dos mellores traballos fin de grao de Ciencias

• Ourense
• Estudantes

Un estudo sobre a valoración nutricional dos menús ofertados nun comedor escolar, outro sobre a optimización de envases para a industria alimentaria mediante simulación numérica por elementos finitos e outro sobre a deposición de metais pesados a un solo de bosque caducifolio a través da caída de material senescente. Estes son os tres traballos fin de grao realizados por estudantes do campus de Ourense que este curso veñen de acadar os premios aos mellores traballos fin de grao da Facultade de Ciencias. Estes galardóns, que foron entregados no acto de graduación do centro, teñen como obxectivo recoñecer e potenciar o esforzo investigador do seu alumnado.

15/06/2017

Os estudantes sénior despiden o curso académico desde o escenario

• Ourense
• Estudantes

Co curso académico xa na súa recta final, sucédense no campus de Ourense os actos de graduación e as celebracións de fin de curso. Este mércores os protagonistas foron os alumnos e alumnas do seu Programa Universitario de Maiores. A Asociación de Maiores do campus ourensán foi a encargada de organizar un festival de fin de curso no que os propios estudantes sénior foron os encargados de subir ao escenario para contar contos, para cantar e para tocar algún instrumento. Con esta festa, que compartiron estudantes e responsables do Programa Universitario de Maiores e familiares, os seus organizadores quixeron pechar o curso cun bo sabor de boca.

15/06/2017

Alumnado do campus explica en Saarbrücken o modelo turístico galego

• Ourense
• Estudantes

Desde o pasado sábado, día 10 de xuño, e ata o 17 de xuño, 15 estudantes da Facultade de Ciencias Empresariais e Turismo do campus de Ourense participan nun seminario internacional na universidade alemá HTW Saar, da cidade de Saarbrücken, en Alemaña. Alí comparten convivencia e aprendizaxe co alumnado desa universidade, ao que teñen a misión de explicarlle as principais características de Galicia e do seu modelo de desenvolvemento turístico. “O seminario está indo moi ben, os estudantes están encantados co recibimento que tiveron e pola oportunidade que teñen de vivir unha experiencia deste tipo. Todos lles sorprende”, explica Elena de Prada.

14/06/2017

Ciencias, Historia e Ciencias da Educación presentan a 234 novos egresados e egresadas

• Ourense
• Estudantes

As graduacións continúan no campus de Ourense e o pasado venres e sábado chegou a quenda de despedir aos novos egresados e egresadas das facultades de Historia, Ciencias e Ciencias da Educación. Acompañados de familiares, membros da comunidade universitaria e amigos, os novos titulados e tituladas celebraron o remate con éxito dos seus estudos superiores e o inicio dunha nova etapa profesional e persoal. Elas e eles recolleron de mans das autoridades presentes as súas bandas e diplomas e recibiron palabras de recoñecemento polo esforzo feito e de ánimo para o futuro.

12/06/2017

Unha nova promoción de Enxeñaría Informática despídese do campus

• Ourense
• Estudantes

Os actos de graduación sucédense estas semanas no campus de Ourense e este xoves chegou o gran momento para o alumnado de último curso do Grao en Enxeñaría Informática da Escola Superior de Enxeñaría Informática. Trátase de cinco egresadas e 37 egresados que rematan con éxito o seu paso pola universidade e que afrontan a súa saída laboral coa confianza que dá non só ter formación superior senón tamén contar o seu colectivo profesional cunha das taxas de empregabilidade máis altas do mercado.

09/06/2017

A sorrir tamén se aprende

• Ourense
• Estudantes

"Do que se trata neste taller de ioga da risa é de sacar o neno que levamos dentro". Deste xeito resume José Luís Alves Montesino, monitor en técnicas de risoterapia e líder certificado en ioga da risa, o obxectivo do obradoiro que este xoves arrancou no campus de Ourense centrado nesta técnica. Ao longo de dúas sesións, as persoas inscritas afondarán dun xeito práctico e lúdico en como xogando co sorriso e coa respiración poden mellorar o seu benestar persoal, e polo tanto o das persoas que os rodean. Sorrir, sinalan os promotores da iniciativa, é gratis, non fai falla motivos para facelo e os beneficios que reporta a quen o practica son moitos.

08/06/2017

A quinta promoción do grao de Dereito di adeus ás aulas

• Ourense
• Estudantes

O campus de Ourense e especialmente a súa Facultade de Dereito celebrou este venres o acto de graduación da quinta promoción do grao en Dereito que se imparte nese centro. 48 novos xuristas recolleron as súas bandas e diplomas coa satisfacción de rematar con éxito unha etapa moi importante da súa vida, os estudos universitarios, e coa ilusión de comezar outra, a carreira profesional. Celebrando con eles e elas este momento tan especial para os estudantes estiveron familiares, amigos, membros da comunidade universitaria e autoridades.

05/06/2017