Novas do DUVI

Teatro, xogos deportivos, cine e actuacións musicais deron a benvida a todos os alumnos

• Pontevedra
• Estudantes

As diferentes escolas e facultades do campus da Xunqueira mudaron por un día o seu aspecto habitual de xeito que en lugar de estudantes, cargando libros e entrando nas aulas, chamaba a atención as actuacións teatrais nos comedores de Ciencias Sociais e de Forestais, a sesión de monólogos en Fisioterapia ou os estudantes xogando ao floorball, o mazaball ou frisbee en Ciencias da Educación e do Deporte. Tratábase da Festa de Campus, unha iniciativa da Área de Extensión Cultural e Estudantes para dar a benvida a todos os alumnos e “para que se coñezan entre eles e que comecemos con ánimo e forza o curso”, explicou a directora da área, Ana Belén Fernández Souto.

17/10/2008

Os estudantes de primeiro descobren nunha charla os privilexios de ser universitario

• Vigo
• Estudantes

Poder facer pontismo ou paracaidismo a prezos accesibles ou estudar un ano nunha universidade americana e convalidar a estancia foron algún dos temas que máis interese espertaron entre os mozos que acaban de comezar o seu periplo coma estudantes universitarios e que hoxe asistiron a charla “Privilexios dun universitario”, unha iniciativa para dar a coñecer entre os alumnos de primeiro as ofertas que pon á súa disposición a Universidade de Vigo. Acaban de chegar e teñen xa as súas axendas repletas: concertos, exposicións, conferencias, actividades deportivas, voluntariado...

08/10/2008

A Universidade comeza curso con 381 alumnos estranxeiros na súas aulas

• Vigo
• Estudantes

Nun curso marcado pola implantación dos primeiros graos adaptados ao Espazo Europeo da Educación Superior, a Facultade de Filoloxía e Tradución acolleu hoxe o acto de benvida aos 282 alumnos estranxeiros que este curso van estudar nalgún dos centros do campus de Vigo. A eles hai que sumar 58 no campus de Ourense e 41 no de Pontevedra, en total 381 estudantes que elixiron a Universidade de Vigo para levar a cabo as súas experiencias de intercambio.
Iván Area, vicerreitor de Relacións Institucionais, foi o primeiro en desexarlles unha boa estancia e felicitalos pola súa elección. Acompañárono os responsables de diferentes servizos da institución que lles presentaron a oferta formativa e de lecer para este curso. Dende cursos de cultura galega e excursións a diferentes áreas da nosa xeografía ata música, obradoiros, exposicións ou deportes foron algunha das actividades que se expuxeron para que os estudantes foran enchendo as súas axendas.

03/10/2008

Gran maioría de mulleres entre os estudantes estranxeiros do campus

• Pontevedra
• Estudantes

41 alumnos estranxeiros permanecerán este primeiro cuadrimestre do curso en algunha das escolas e facultades do campus, coa novidade de que nesta ocasión a gran maioría deles son mulleres. Así o fixo saber o vicerreitor de Relacións Institucionais, Iván Area, nun acto para dar a benvida aos novos estudantes que comezan a súa estancia en Pontevedra. “Somos minoría, este curso comeza cun 75% de mulleres foráneas e un 25% de homes, un dato que o diferenza do resto dos campus da Universidade”.

02/10/2008

O programa Ensaiamos consolídase como dinamizador da actividade musical

• Vigo
• Estudantes

Dende a súa posta en marcha no ano 2006, o programa Ensaiamos estase a consolidar como un potente dinamizador do panorama musical universitario. Co comezo do novo curso a vicerreitoría de Extensión Cultural e Estudantes volve a poñer a disposición dos estudantes deste servizo de apoio a grupos musicais que, nos últimos anos tivo unha alta aceptación. Segundo explica Alfonso Caride, técnico de Actividades Culturais, “este é un dos proxectos dos que máis satisfeitos nos sentimos e que viu a responder a unha demanda que existía entre os universitarios para poder acceder a locais de ensaio”.

01/10/2008

Expertos en lexislación e natureza danse cita na Facultade de Ciencias coas II Xornadas de Medio Ambiente e Dereito Ambiental de Galicia

• Ourense
• Estudantes

Co aval de máis de 500 participantes no 2007, hoxe presentáronse en Ourense as II Xornadas de Medio Ambiente e Dereito Ambiental nas que do 20 ao 24 de outubro se darán cita na Facultade de Ciencias unha destacada representación de especialistas en lexislación e natureza. Organizadas pola asociación universitaria SYME, entre as principais novidades desta edición destaca a introdución no programa de temas relacionados coa saúde ambiental

30/09/2008

Universia entrega os diplomas das bolsas Fernando Alonso a estudantes universitarios

• Vigo
• Estudantes

Fórmula 1 e o mundo empresarial. Este foi o tema do traballo co que a estudante de Administración e Dirección de Empresas, Alexandra Fernández, acadou unha das bolsas Universia Fernando Alonso de prácticas profesionais que este sábado de entregan oficialmente en Madrid.
Grazas a este iniciativa, a estudante viguesa poderá realizar tres meses de prácticas nunha sucursal do Banco Santander, xunto con outros 99 universitarios de toda España, unha iniciativa que ten como obxectivo fomentar a experiencia profesional dos estudantes para facilitarlles o acceso ao mercado laboral. Xunto con Alexandra, forman parte deste programa outros dous estudantes galegos.

19/09/2008

SYME colabora con tres concellos da provincia en actividades de educación ambiental

• Ourense
• Estudantes

Fomentar o uso eficiente da auga, o aforro enerxético e a compostaxe doméstica é o obxectivo das novas actividades de educación ambiental que se desenvolverán nos próximos meses nos concellos de Amoeiro, Boborás e Maside coa colaboración da Asociación Medioambiental e Universitaria SYME.
Coas novas campañas, presentadas hoxe no Concello de Maside, preténdese conseguir que a poboación vaia asimilando a importancia do desenvolvemento sostible, inculcar neles a idea de aforro enerxético e fomentar o uso racional da auga coma un ben común pero escaso. Ademais, tratarase de explicar e fomentar o uso e funcionamento dos compostoiros e vermicompostoiros.

16/09/2008

A ex alumna de Esdemga, Alba Blanco, presenta a súa nova colección no "Ego de Cibeles"

• Pontevedra
• Estudantes

Alba Blanco, alumna graduada na primeira promoción da Escola Superior de Deseño Téxtil e Moda de Galicia, Esdemga, participará na vindeira edición da pasarela madrileña O Ego de Cibeles. A nova deseñadora, que xa amosara o seus traballos na recoñecida pasarela, exporá a súa nova colección no showroom que se organiza todos os anos paralelo aos desfiles. Trátase dunha sala onde os artistas contan cun espazo propio para mostrar as súas obras ao público e á prensa especializada.

16/09/2008

A ETSE de Industriais dá a benvida aos novos alumnos antes do comezo das clases

• Vigo
• Estudantes

Presentar o centro e orientar aos novos alumnos é o obxectivo co que a Escola Técnica Superior de Enxeñeiros Industriais está a preparar para o vindeiro venres un acto de benvida aos 210 estudantes que xa se matricularon nesta titulación. Pese a que o inicio oficial das clases será o 22, desde a dirección da escola, organizaron o acto para que os estudantes se incorporen coñecendo xa as instalacións e persoal da escola.

16/09/2008

María Juanatey, alumna de Publicidade e RRPP, gaña o certame nacional de talentos creativos “Versus”

• Pontevedra
• Estudantes

María Juanatey, alumna de cuarto curso de Publicidade e Relacións Públicas da Facultade de Ciencias Sociais e da Comunicación é unha das gañadoras do certame nacional de talentos creativos, Versus, que organiza o Club de Creativos para captar novas promesas. Na competición participaron 300 estudantes procedentes de universidades e escolas de comunicación de toda España, dos cales foron seleccionados os 34 mellores, entre eles a representante da institución viguesa María Juanatey.

09/09/2008

Múltiples actividades consolidan outubro como o mes do medio ambiente no campus

• Ourense
• Estudantes

Un ciclo de cine e un seminario de fotografía ambiental impartido por un dos fotógrafos de WWF /Adena son as principais novidades que traerá o novo curso da man da Asociación Medioambiental Universitaria SYME. Ademais repetirán clásicos como o concurso de fotografía, unha das actividades que esperta máis interese entre os universitarios, e chegará unha segunda edición das Xornadas de Medio Ambiente, nas que o pasado ano se inscribiron máis de 500 participantes.

04/09/2008

O 70% dos estudantes de intercambio valoran como excelente a estadía no estranxeiro

• Vigo
• Estudantes

Ano tras ano as estadías no estranxeiro estanse a converter nunha opción moi demanda entre os universitarios. E é que a experiencia, tanto persoal como académica, que aportan os diversos programas de intercambio son altamente valoradas polos estudantes que tiveron unha destas bolsas. O 70% definen como excelente a súa estancia nas universidade de acollida, como se desprende dun estudo realizado pola Universidade de Vigo entre máis de 900 alumnos entre os cursos 2005-06 e 2006-07.

22/08/2008

Unha ducia de estudantes da Facultade de Bioloxía descobren os tesouros do parque das Fragas do Eume aos visitantes

• Vigo
• Estudantes

Non todos os estudantes aproveitan o verán para descansar, e a aqueles aos que os exames de setembro obrigan a non afastarse dos libros, únense os que destinan estes meses a traballar. Este é o caso dunha ducia de estudantes da Facultade de Bioloxía que este verán comparten os seus coñecementos cos visitantes do parque natural das Fragas do Eume, o bosque costeiro mellor conservado de Europa.
Os estudantes acompañan aos visitantes, en grupos reducidos, nos percorridos que realizan polo parque onde teñen ocasión de descubrir un patrimonio natural de gran valor.

07/08/2008

Apertura nocturna e en fin de semana da biblioteca de Torrecedeira e das centrais de Pontevedra e Ourense

• Vigo
• Estudantes

Ante a proximidade dos exames extraordinarios de setembro, as bibliotecas centrais dos campus de Pontevedra e Ourense, así como a de Torrecedeira, ampliarán os seus horarios de apertura para facilitar o estudo a aqueles que teñen materias pendentes. Deste xeito, tanto polas noites como nas fins de semana, os estudantes que así o precisen disporán dun lugar axeitado para reencontrarse con libros e apuntes tralo período de descanso.

29/07/2008