Novas do DUVI

Os alumnos de Belas Artes achegan a súa arte aos máis pequenos

Co obxectivo de transmitir a súa arte aos máis pequenos, os alumnos de primeiro e segundo curso da Facultade de Belas Artes colaboran no Salón do Libro Infantil e Xuvenil de Pontevedra que se celebra na cidade ata o vindeiro 2 de febreiro. O centro educativo participa nesta iniciativa desde a súa primeira edición e, este ano, os estudantes achéganse aos nenos a través dun proxecto de ambientación dos espazos, unha exposición e un obradoiro de graffiti, unha das novidades do salón. O estudante Alexis Parada, coñecido como Ras, será o encergado de achegar ao público xuvenil a esta arte da rúa.

O complexo dunar de Corrubedo é un hábitat favorable para albergar unha poboación de sapoconcho europeo

Co obxectivo de contribuír á conservación da especie de sapoconcho europeo (Emys orbicularis), o réptil máis ameazado de extinción en Galicia, o grupo de Ecoloxía Evolutiva e da Conservación da EU de Enxeñaría Técnica Forestal, comezou unha investigación para comprobar ata que punto as condicións climáticas e biolóxicas do complexo dunar de Corrubedo e as lagoas de Carregal e Vixán eran compatibles cunha futura reintrodución da especie. Tras varios anos de estudo e traballo, o director do proxecto, Adolfo Cordero, concluíu que o ambiente de Corrubedo é apropiado para a supervivencia da especie, polo que unha futura reintrodución, despois dun proxecto de mellora do hábitat, ten unha elevada probabilidade de éxito.

Os lodos vermellos evitan a corrosión das estruturas de formigón armado

Os lodos vermellos procedentes da extracción de alumina poden poñer fin á corrosión das estruturas de formigón armado. Así o determinou a investigadora Belén Díaz na súa tese de doutoramento, un estudo no que se formulou como principal obxectivo determinar a técnica máis axeitada para evitar a corrosión dos aceiros inxeridos neste tipo de estruturas. A idea da que parte esta licenciada en Ciencias Químicas é que a elevada alcalinidade do formigón confire a este tipo de estruturas unha adecuada durabilidade.

A Universidade, exemplo para a creación de oficinas de I+D en Marrocos

Co obxectivo de fomentar a creación de oficinas de I+D no seo das universidades marroquís, dentro do programa Tempus, púxose en marcha o proxecto STIMU (Structuration d’Interfaces marocaines université-entreprise). A Universidade de Vigo toma parte nesta iniciativa, coordinada pola Universidade de Burdeos, asesorando ás cinco institucións norteafricanas implicadas.
Posta en marcha en xaneiro de 2006, esta iniciativa atópase nunha fase de valoración dos plans de viabilidade das universidades de Marrocos, para o que se conta cun xurado internacional no que participa Ángeles López, directora da Oficina de I+D da Universidade. Trátase da etapa final deste programa para o que se convocou un premio dirixido ás institucións educativas que deben presentar os seus proxectos para a creación ou posta en marcha da súa Oficina de Interfaz Universidade-Empresa, equivalente ás oficinas de I+D ou OTRI.

O Servizo de Apoio á Investigación incorpora dous novos técnicos

A Universidade segue a incrementar a súa aposta pola I+D+i, neste caso coa consecución de dous contratos dentro do Plan de Recursos Humanos da Xunta. Grazas a eles, Cristina López Macías e Marcos López Mosquera incorporáronse como novos técnicos para o Servizo de Apoio á Investigación no campus de Ourense. Aínda que a súa situación definitiva estará no Centro de Investigación, Transferencia e Innovación (CITI) ata que este sexa inaugurado realizarán o seu traballo na planta menos un do Edificio de Ferro.

Constante afluencia de usuarios esta fin de semana na Biblioteca Central do campus

Esta fin de semana os estudantes fixeron algo máis que descansar xa que, a piques de empezar os temidos exames do primeiro cuadrimestre, hai moitos apuntes que memorizar e moitos traballos que entregar. Desta volta, a novidade foi a apertura da Biblioteca Central do campus os sete días da semana mentres dure a época de avaliacións, sendo esta fin de semana a primeira das catro en total nas que manterá abertas as portas. Ao longo do sábado e do domingo, a afluencia de estudantes foi constante, sendo a tarde do sábado o momento de maior número de usuarios con 145 persoas. Na mañá do domingo foi cando menos actividade se rexistrou, recuperando un pouco xa pola tarde, cando se contabilizaron 75 alumnos arredor das 17.00 horas.

A falta de transparencia na implantación da Rede Natura 2000 provoca a desconfianza das sociedades rurais afectadas

A ausencia de consenso e a opacidade no procedemento de designación dos lugares que conforman a Rede Natura 2000, a principal normativa para a conservación da natureza na Unión Europea, é unha das causas do elevado descontento dos implicados no proceso, como son as organizacións profesionais agrarias, gandeiras, forestais e cinexéticas, así como os propietarios, corporacións municipais e sindicatos. Esta falta de transparencia por parte das autoridades españolas é unhas das denuncias que se expoñen na tese de doutoramento da avogada Isabel Manzano, quen salienta que, á hora de implantar dita rede non houbo unha fase previa de información pública ou de consulta aos interesados.

O grupo de investigación RGEA supera os 40 artigos en revistas económicas internacionais

“Estudar a economía nas súas diversas áreas, dende as máis teóricas ata as máis prácticas, como a organización industrial”, así define o catedrático Carlos Hervés o grupo de investigación no que leva a cabo o seu labor, o RGEA, Research Gropu in Economic Analysis. “A economía matemática, teoría económica, macroeconomía, teoría de xogos e economía internacional” son os seus principais campos de traballo.
Nos últimos cinco anos o grupo publicou uns corenta traballos de investigación de calidade en revistas de economía de difusión internacional e no Journal Citation Reports (JCR).

Unha tese afonda nun tipo de compostos químicos que non danan o ozono

Refrixerantes, disolventes de produtos de limpeza ou propelentes de aerosois son algúns dos usos nos que se empregan os “hidrofluoroéteres” (HFE) e sobre eles realizou a súa tese de doutoramento o investigador Javier Cendón. “O interese nestes compostos débese ás súas propiedades medio ambientais, xa que non danan o ozono e a súa contribución ao efecto invernadoiro é moi inferior á dos antigos clorofluorocarbonos. Tamén os fai interesantes a súa versatilidade desde o punto de vista industrial”, destaca o autor.

“Os agricultores son os mellores axentes para acadar a conservación ambiental do medio rural xa que son os principais xestores do territorio”

No marco dun programa de actividades paralelo á Semana Verde Internacional que se está a celebrar estes días en Berlín, teñen lugar numerosos congresos e conferencias, entre os que destaca a xornada Cooperación entre agricultura e protección ambiental, onde o profesor da Escola Universitaria de Enxeñaría Técnica Forestal, Enrique Valero, representará á Universidade. O obxectivo do evento é concienciar de que o único xeito de acadar altas cotas de mantemento da biodiversidade é mediante a cooperación mutua entre os propietarios das terras e os gobernantes de cada comunidade.

Residuos agrícolas, forestais e madeireiros servirán de combustible para crear un sistema sostible de calefacción

O gran potencial que ten Galicia para transformar a biomasa en fontes de enerxía é, en opinión dos enxeñeiros forestais, unha das grandes vantaxes que presenta esta comunidade e a E.U. de Enxeñaría Técnica Forestal quere sacarlle o máximo proveito. Neste senso, desde fai uns meses e durante os próximos tres anos, un grupo de investigadores deste centro, apoiados por expertos de Castilla-León, Alemaña, Grecia, Italia e Austria, analizarán a viabilidade de converter produtos residuais en combustible para sistemas sostibles de calefacción.

Os pensos funcionais melloran a calidade dos polos grazas á súa incidencia na poboación microbiana do intestino do animal

O desenvolvemento de procesos con base biotecnolóxica para a súa aplicación nos eidos ambiental e alimentario é o principal obxecto das investigacións do equipo dirixido por Lorenzo Pastrana. O grupo de Biotecnoloxía Alimentaria e Ambiental traballa, principalmente, na producción de bacterias lácticas probióticas e bacteriocinas para aplicalas en pensos animais, mellorando así a alimentación e dos polos e, consecuentemente, a súa calidade. Segundo explica Pastrana, “buscamos que o penso teña certas funcionalidades e moitas delas teñen relación coa presenza no tracto dixestivo de certos microorganismos que resultan beneficiosos e fan que o animal medre máis rápido, aproveite mellor os nutrientes e enferme menos".

Dous alumnos representan á Universidade no congreso internacional "UNIV 08"

Laura Vázquez e Gael Sande, son os dous alumnos que representaron á Universidade de Vigo na fase local do congreso internacional UNIV 08 que este ano trata o tema Ser, aparecer, comunicar: entretemento e felicidade na sociedade multimedia. A curiosidade por saber como é un congreso foi o que levou a estes emprendedores a participar no único evento deste tipo dirixido unicamente a estudantes. “Nunca antes participara en algo así e o vin como unha boa oportunidade de saber como son estes eventos”, explicou Laura Vázquez , alumna de terceiro curso da Licenciatura en Publicidade e Relacións Públicas.

A spin-off Inbiogal ofrecerá ferramentas para detectar, mediante análises de sangue, enfermidades como o cancro e facer probas de paternidade

Publicacións, premios, patentes. A traxectoria do grupo de investigación de Biomarcadores Moleculares na última década deixa para os seus compoñentes múltiples recoñecementos ao seu traballo. Un último exemplo deste éxito investigador é a posta en marcha da spin-off Inbiogal, que bota a andar esta semana para poñer ao servizo dos laboratorios clínicos e da industria as ferramentas bioquímicas e xenéticas coas que traballan. Segundo explica o director deste grupo BB1, Francisco Javier Rodríguez Berrocal, “a empresa créase co mesmo fundamento que o grupo, podemos detectar proteínas e xenes relacionados con case calquera proceso. Queremos ofrecer esta metodoloxía para calquera utilidade biolóxica e isto inclúe dende probas de paternidade, ata o diagnóstico complementario de enfermidades, pasando polo sexado de aves.”

Alberto Gago destaca o papel exemplar e de vangarda no desenvolvemento sostible que deben xogar as universidades