Novas do DUVI

"The Sunday Drivers" abre a programación cultural para o segundo cuadrimestre

• Vigo
• Cultura

Tiny Telephone, Little Heart Attacks e Time, Time, Time son os traballos que o grupo The Sunday Drivers trouxo ao Teatro Vidal Bolaño para abrir a programación cultural que a Universidade ten elaborado para o segundo cuadrimestre. O quintento, orixinario de Toledo, presentouse ante o numeroso público congregado no escenario do campus vigués con temas como Paranoid, estrela do seu último disco, Do it e Tiny Telephone, de albums anteriores, que despertaron o entusiasmo dos asistentes.

27/02/2008

Poesía e música para a presentación da oda á cidade de Vigo, “Fóra do sagrado”

• Ourense
• Cultura

Anxo Angueira chega ao campus para presentar a súa última obra, Fóra do sagrado, cun acto literario-musical no que recitará o extenso poema acompañado pola música de Leo i Arremecághona e Aser Álvarez e coa intervención plástica de Xosé Luís e Xoán Carlos de Dios como fondo . Fóra do sagrado é un canto ao Vigo real, feito para ser declamado, no que se reflicten as contradicións dunha cidade cosmopolita e mariñeira.
O recital terá lugar ás 20.00 horas no pequeno anfiteatro da entrada do campus, xa que un dos obxectivos de A Intercultural, na que se enmarca o acto, é converter todos os espazos en escenarios artísticos.

 

27/02/2008

A oferta de obradoiros para segundo cuadrimestre aposta pola seguridade viaria, o software libre, a cultura xaponesa ou a fotografía submarina

• Vigo
• Cultura

Temas de actualidade como a seguridade viaria ou as posibilidades do software libre e clásicos como a cultura xaponesa ou a fotografía submarina son algunhas das apostas do obradoiros para o segundo cuadrimestre. Unha vez rematados os exames e retomada a vida académica, tamén volve ao campus a oferta de actividades da Vicerreitoría de Extensión Cultural e Estudantes, que está aberta á sociedade en xeral. En total, os interesados poden elixir entre 16 obradoiros para os que a matrícula, que xa está aberta, poderá formalizarse ata o 7 de marzo.

26/02/2008

O coro do campus quere consolidarse e abrirse á cidade de Ourense

• Ourense
• Cultura

Tras dous anos ofertado como Obradoiro de canto, o coro do campus quere consolidarse como Coro Universitario de Ourense. A actividade segue presente na oferta de cursos de extensión de xeito gratuíto pero ademais está aberta a toda a mocidade da cidade que desexe participar nela, sen que sexan necesarias máis que unhas condicións mínimas de oído musical e voz. Xavier Álvarez, director da agrupación explicou que "é absurdo concebir unha universidade sen coro polo enriquecedor da experiencia".

26/02/2008

Novidade e calidade distinguen as actuacións musicais e teatrais do segundo cuadrimestre

• Vigo
• Cultura

Coa música dos The Sunday Drivers comezarán, o vindeiro mércores 27 de febreiro, as actuacións programadas pola Vicerreitoría de Extensión Cultural e Estudantes, para o segundo cuadrimestre do curso.
Máis dunha ducia de actuacións musicais e teatrais, co denominador común da orixinalidade, sucederanse ata o vindeiro 14 de maio nos escenarios habituais do campus universitario, aos que se sumarán o Conservatorio Superior de Música de Vigo e o Auditorio do Centro Cultural Caixanova.
Como xa sucedera en anos anteriores o ciclo Circuíto4X4 de apoio á música tradicional galega, así como o de teatro ALT, volven incluír nos seus respectivos programas, algunhas das actuacións que forman parte do programa deste segundo cuadrimestre do curso.

25/02/2008

Actividades para todos os gustos no programa de obradoiros do segundo cuadrimestre

• Ourense
• Cultura

Coa estrea do segundo cuadrimestre chega a nova programación dos obradoiros que dende marzo ata o remate de curso terán lugar no campus. En total, 18 propostas para todos os gustos das que seis son novidade e que abarcan dende a maxia ás técnicas de benestar emocional. Os cursos están dirixidos ao público en xeral, con mellor prezo para os membros da comunidade universitaria e os bolseiros. O prazo de inscrición xa está aberto e rematará o vindeiro 7 de marzo.

 

25/02/2008

A Universidade destina 15.600 euros en premios para os concursos de creación artística

• Vigo
• Cultura

Creación Audiovisual, fotografía, maquetas de música e pintura. Estas son os catro concursos de creación artística para os que a Universidade destina 15.600 euros en premios. Ano tras ano, dende a Vicerreitoría de Extensión Cultural e Estudantes convócanse estes concursos coa finalidade de promover entre a comunidade universitaria os diversos ámbitos da arte.
Entre os catro concursos repartiranse 15.600, dos cales 8500 € serán para a modalidade de creación audiovisual, 2000 € para a de fotografía, 1500 para a de pintura e 3600 € para o certame de maquetas de música. O prazo de presentación dos traballos para as catro categorías remata o vindeiro 27 de xuño.

22/02/2008

Os vellos ordenadores terán unha nova vida en organizacións sen ánimo de lucro

• Vigo
• Cultura

Ordenadores antigos con tecnoloxía innovadora. Iso é o que ofrece o Grupo de Reciclaxe Informática da Universidade, GRUVI, ás entidade sen ánimo de lucro, dentro dunha iniciativa de doazón de material informático en desuso. Trátase de así recuperar equipos que, para o traballo diario da institución quedan obsoletos, pero que para outro tipo de finalidades están aínda en boas condicións.
Este programa, posto en marcha no curso 2005-2006 dende a Oficina de Voluntariado e Integración, foi crecendo con forza tanto na cantidade de material recollido como no número de solicitudes por parte das asociacións. O obxectivo é ofrece unha segunda oportunidade a este material desbotado dotándoo con programas de software libre, que inclúen un sistema operativo, conexión a internet e aplicacións ofimáticas.

21/02/2008

Teatro e información para combater a explotación dos traballadores téxtiles nas Olimpíadas de Beijing

• Ourense
• Cultura

A Oficina de Voluntariado presentou polas aulas do campus a campaña Xoga Limpo 2008 da que a ONG Amarante é responsable en Galicia e que se acaba de lanzar dentro do programa Roupa Limpa. A iniciativa denuncia a precariedade laboral das persoas que traballan no sector téxtil nos países do sur e neste caso concreto, en China, onde este ano se celebran as Olimpíadas. A actividade de sensibilización foi introducida nas clases por sorpresa polo grupo de Teatro Marañón, colaborador da campaña.

21/02/2008

Autónomos e empregados públicos poderán coñecer os detalles dos estatutos que regulan a súa actividade

• Vigo
• Cultura

O Estatuto do Traballador Autónomo e o Estatuto Básico do Empregado Público serán os protagonistas dunha xornada que a Asociación Xustiza e Sociedade Galega vai desenvolver este venres co obxectivo de facer unha análise sobre os pormenores e implicacións sociais das novas leis, entradas en vigor no 2007. Trátase de “dous grandes temas que hoxe en día están de actualidade no ámbito das relacións do traballo”, tal como afirma o catedrático de Dereito do Traballo Jaime Cabeza.

20/02/2008

Presentación conxunta dos novos programas “Ponte en forma” do Servizo de Deportes, e “A Intercultural” de Actividades Culturais

• Ourense
• Cultura

A vicerreitoría do campus vén de presentar os novos programas de Actividades Culturais e do Servizo de Deportes. O primeiro deles, denominado A Intercultural comprende iniciativas musicais, audiovisuais, divulgativas e outras determinadas polos espazos onde se realizan. Pola súa banda, o proxecto Ponte en forma pretende achegar o exercicio físico controlado por profesionais á comunidade universitaria para a mellora da súa saúde.

19/02/2008

Unha exposición de láminas en tinta chinesa ridiculiza os intentos do ser humano por controlar o cosmos

• Ourense
• Cultura

Virus transxénicos debuxados en tinta chinesa conforman a exposición de láminas Liquen/microbiontes. Tintas e auga que, a modo de bestiario, permanecerán nas paredes da Biblioteca Central ata o vindeiro 14 de marzo. Con estes seres, o artista, Liken, pretende transmitir a idea de que o home non pode controlar o mundo e vencer ao caos e que o mero feito de intentalo non ten sentido porque está condenado a fracasar. Álex Gómez é o autor que se esconde baixo o pseudónimo de Liken. Alumno de Belas Artes en Pontevedra, destaca polos seus traballos de graffiti e pintura mural ao longo de todo o mundo.

18/02/2008

Chega o suspense ao campus coa estrea da curtametraxe “El testigo”

• Ourense
• Cultura

O campus énchese de suspense coa estrea hoxe da curtametraxe El testigo, no que a comunidade universitaria tivo un papel destacado coa participación de numerosos ex alumnos e incluso do profesor Daniele Tommasini. A proxección terá lugar este mércores no salón de actos do Edificio Politécnico ás 20.30 horas. O filme, de 24 minutos de duración foi producido e dirixido por Daniel Cid, que escolleu diferentes puntos da cidade de Ourense como escenario.

12/02/2008

Cámaras de seguridade e elementos de obra, a aposta de Fran Meana na sala Alterarte

• Ourense
• Cultura

Por medio de cámaras de seguridade e elementos de construción, Fran Meana pretende expresar a súa particular visión da arte contemporánea e, concretamente, das repercusións dunha revolución no eido da cultura. A súa exposición, baixo o título Pintar o trono, pódese visitar na sala Alterarte dende o 11 de febreiro e ata o vindeiro 21 de marzo. Ao acto de inauguración acudiron o autor e o comisario da exposición e coordinador do proxecto, Ignacio García, que comentou a importancia de fomentar a investigación artística dentro da Universidade.

11/02/2008

Esdemga consolídase como a escola de deseño e moda referente en Galicia

• Pontevedra
• Cultura

O deseño galego está de moda e así se confirmou fai apenas dez días cando, sete alumnas da Escola de Deseño Téxtil e Moda de Galicia (Esdemga), presentaron as súas coleccións ante os ollos dos mellores e máis importantes profesionais do eido da moda en España, no Ego de Pasarela Cibeles. Cando se lles pregunta pola experiencia a reposta é clara, “compartíamos escenario con xente que leva moitos anos neste mundo e os nosos deseños estaban ao mesmo nivel ou incluso eran superiores”, comentou Amai Rodríguez, unha das alumnas da primeira promoción que participou no desfile. Con este xa son moitos os logros que leva acadado Esdemga con tan poucos anos de existencia e consolidándose, deste xeito, como a escola de deseño e moda referente en Galicia e que pouco a pouco estase facendo un oco entre as principais a nivel nacional.

11/02/2008